QR Úkimeti otyrysynyń qorytyndysy boiynsha ótken baspasóz konferentsiiasynda Premer-Ministrdiń orynbasary Eraly Toǵjanov Qazaqstanda koronavirýs infektsiiasynyń taralýyna jol bermeý boiynsha Úkimettiń qabyldap jatqan sharalary týraly aityp berdi, dep habarlaidy "Ult aqparat" .
E. Toǵjanov atap ótkendei, Memleket basshysy Q. Toqaev Qytaida paida bolǵan koronavirýstyń Qazaqstan aýmaǵyna taralýyna jol bermeý jóninde Úkimetke naqty uiymdastyrý sharalaryn qabyldaýdy tapsyrdy jáne jaǵdaidy óziniń jeke baqylaýynda ustap otyr.
«Premer-Ministr Úkimet otyrysynda bul máseleni kún saiyn qaraýda. Arnaiy is-sharalar jospary bekitilgen. Atalǵan máseleni jiti qadaǵalaýda ustaý maqsatynda qurylǵan Úkimettik vedomstvoaralyq komissiia turaqty jumys atqaryp, kúndelikti qajetti sharalar boiynsha naqty sheshimderdi iske asyryp otyr», — dedi vitse-premer.
Onyń aitýynsha, osy ýaqytqa deiin 11 otyrys ótkizilip, tiisti organdarǵa 110-nan astam tapsyrma berildi.
Sonymen qosa, virýstyń taralý aimaǵy qysqa merzim aralyǵynda jyldam artqanyn atap ótti. Búgingi tańdaǵy málimetke sáikes, virýs álem boiynsha 88,4 myń adamǵa juqqan, 3 myń adam qaitys bolyp, 42,8 myńnan astam adam jazylyp shyqqan.
Álemde jaǵdaidyń ýshyǵýyna bailanysty, Úkimet birqatar qosymsha sharalardy qabyldady.
Máselen, QHR-men jolaýshylar avtobýsynyń tasymaly, jolaýshylar poiyzynyń tasymaly men áýe qatynastary, jaiaý ótý toqtatyldy.
QHR-dan júk tasymalyn júzege asyratyn avtomobil kólikteriniń júrgizýshileri úshin (27.02.2020 jaǵdai boiynsha 22 avtomashina) meditsinalyq baqylaý algoritmi belgilendi. Búginde barlyq júk tasymaly tek temir jol arqyly ótedi.
«Biz shekarada barlyq qajetti sanitarlyq sharalardy qabyldadyq. Qazaqstan aýmaǵyna kiretin adamdardy, onyń ishinde mashinalardy shekteý boiynsha sharalar qabyldandy. Olardyń eshqaisysy munda kelmeidi. Avtomobil júk tasymalyna qatysty naqty sharalar qabyldandy. Sońǵy táýlikterde nebári 10 avtokólik ótti. Iaǵni, biz olardyń sanyn azaittyq», — dedi vitse-premer.
E. Toǵjanovtyń aitýynsha, bul sharalar Qazaqstan–Qytai ózara qarym-qatynastarynyń ekonomikalyq quraýyshyna qarsy, biraq olar qazirgi jaǵdaida óte mańyzdy.
«Ekonomika máselesi – bul asa mańyzdy másele. Aldyn ala málimetter boiynsha, tek Qytai boiynsha 1%-ǵa deiin tómendeý kútiledi. Eger Qytaidyń álem ekonomikasyndaǵy 24% úlesin eskersek, árine, bul másele kóptegen elderge, onyń ishinde Qazaqstanǵa da qatysty bolady. Alaida aýqymdy ekonomikalyq ziian shegetinimizdi túsine otyryp, biz adamdardyń qaýipsizdigi men densaýlyǵyna nuqsan keltirýge quqymyz joq. Biz úshin bul máseleniń ekonomikalyq quraýyshynan góri, adamdardyń qaýipsizdigi men densaýlyǵy mańyzdyraq», — dedi Premer-Ministrdiń orynbasary.
Sonymen qatar, biyl 1 naýryzdan bastap Koreia Respýblikasymen turaqty áýe reisteriniń sany 9-dan 3-ke deiin qysqardy. 1 naýryzdan bastap Iranmen jalǵyz áýe reisi toqtatyldy. 5 naýryzdan bastap Nur-Sultan – Tokio áýe reisteri 2-den 1-ge deiin qysqartylady. 5 naýryzdan bastap Ázerbaijanmen áýe reisi aptasyna 15 retten 3-ke deiin shekteledi, bul Baký reisimen Qazaqstanǵa Iranǵa baratyn Iran jáne Ázerbaijan azamattarynyń ótetindigimen bailanysty.
Sonymen qatar E. Toǵjanov úshinshi elder arqyly birinshi sanattan azamattardyń kelýi erekshe meditsinalyq baqylaýǵa alynǵanyn atap ótti. Birinshi jáne ekinshi sanattaǵy elder úshin sheteldik jumys kúshin tartýǵa ruqsattar berý toqtatyldy.
Vitse-premerdiń aitýynsha, qazaqstandyq stýdentterge qatysty jaqsy jaǵdai qalyptasqan, olardyń kóbisi demalys ýaqytynda Qazaqstanda júr. Olardyń sany shamamen myń adamdy quraidy. Stýdentterdiń barlyǵyna Ońtústik Koreiaǵa shyqpaýǵa keńes berildi. QR BǴM-ge oryn alǵan jaǵdaidy eskere otyryp, atalǵan JOO-lardyń basshylyǵymen oqytý merzimin sozý týraly kelissóz júrgizý týraly naqty tapsyrmalar berildi.
E. Toǵjanov virýsqa qarsy sharalardy oryndaýǵa úlken jaýapkershilikpen qaraýǵa shaqyrdy.
«Qurmetti otandastar, bizdiń árqaisymyz mindetti túrde óz úiimizde, jumys ortasynda, áleýmettik ortada virýsqa qarsy qatań sharalardy oryndaýymyz qajet. Bul Úkimettiń ǵana emes, árbir otbasynyń, árbir memlekettik organnyń, árbir uiymnyń jaýapkershiligi», — dedi Premer-Ministrdiń orynbasary.
Sonymen qatar, ol áleýmettik jeliler arqyly taratylatyn jalǵan aqparatqa senbeýge shaqyrdy. Jalǵan aqparat taratqany úshin zańǵa sáikes qylmystyq jaýapkershilikke tartý qarastyrylǵan.
«Men osy máselege barlyqtaryńyzdan óte baiyppen qaraýdy suraimyn jáne jalǵan aqparatty taratqany úshin qylmystyq jaýapkershilikke deiin tiisti jaýapkershilik qarastyrylǵanyn eskertemin», — dedi E. Toǵjanov.
