Resei Ortalyq sailaý komissiiasy jeksenbi kúni ótken Resei prezidenti sailaýyna qatysqan sailaýshylar daýysynyń besten bir bóligi sanalyp bolǵannan keiin qazirgi memleket basshysy Vldimir Pýtinniń 72 paiyzǵa jýyq daýys jinaǵanyn jariialady. Odan keiingi oryndarǵa Resei Federatsiiasy kommýnistik partiiasy kandidaty Pavel Grýdinin (15,9 paiyz), Resei liberal-demokratiialyq partiiasy jetekshisi Vladimir Jirinovskii (6,9 paiyz), "Grajdanskaia initsiativa" tobynan Kseniia Sobchak (1,39 paiyz) jaiǵasty, dep habarlaidy Azattyq.
"Iabloko" partiiasynyń negizin qalaýshy Grigorii Iavlinskii, "Partiia rosta" saiasi uiymy lideri Boris Titov, "Kommýnisty Rossii" partiiasy jetekshisi Maksim Sýraikin jáne "Rossiiskii obshenarodnyi soiýz" partiiasynan túsken Sergei Babýrin, aldyn ala derekter boiynsha, árqaisysy bir paiyzǵa da tolmaityn daýys jinaǵan.
Ortalyq sailaý komissiiasynyń málimetinshe, prezident sailaýyna daýys berýge sailaýshylardyń shamamen 60 paiyzy qatysqan. OSK jetekshisi Ella Pamfilova sailaý "ashyq ótti" dep málimdedi. Oppozitsiialyq saiasatker Aleksei Navalnyidy jaqtaityn baqylaýshylar daýys bergender sany boiynsha shynaiy kórsetkish budan tómen – 55 paiyz deidi. Resmi derek boiynsha, bunyń aldynda 2012 jyly prezidentti sailaýǵa daýys berý quqyǵyna ie reseilikterdiń 65 paiyzy qatysqan.
Sailaý ýchaskelerindegi jaǵdaidy baqylaǵan belsendiler daýys beretin jerge sailaýshylardy uiymdastyrǵan túrde jappai ákelý, sailaý jáshikterine biýlletenderdi toptap tastaý tárizdi zań erejesin buzý jaittaryn tirkegen. Sonymen birge baqylaýshylarǵa kúsh qoldanylǵan birneshe oqiǵa týraly aqparat taraǵan.
Ortalyq sailaý komissiiasy daýys berý barysynda eleýli burmalaýshylyqtar tirkelmegen dep habarlaǵan. Pýtinniń sailaýy shtaby kemshilikter týraly "biren-saran" aryz-ótinish bolǵanyn aitqan.
