Bir jylda tutynýshylardyń shaǵymy 3 esege ósken. Bul týraly Tutynýshylardyń quqyqtaryn qorǵaý Komitetiniń tóraǵasy Asqar Tynysbekov Astanada ótken baspasóz otyrysynda málimdedi dep habarlaidy "Ult Aqparat".
Ótken jyly Tutynýshylardyń quqyqtaryn qorǵaý Komiteti 50 866 ótinish qarapty. Bul 2022 jylmen salystyrǵanda 3 esege artyp, 2,6 myńnan 7,7 myń shaǵymǵa deiin ulǵaiǵan.
"2023 jyly bólshek saýda – 36,5%, elektrondyq saýda – 15,2%, turmystyq qyzmetter – 12,7%, TKSh – 9,1%, bailanys qyzmetteri – 4,1% jáne t. b. boiynsha ótinishter kóp tústi. Shaǵymdarǵa júrgizilgen taldaý, kásipkerler tarapynan tutynýshylardyń quqyqtaryn buzýdyń óskenin, biznestiń sapasyz taýarlardy satýyn, sondai-aq sapasyz jumystar men qyzmetter kórsetýin, sonymen qatar halyqtyń tutyný mádenietiniń óskenin kórsetedi", -dedi Asqar Tynysbekov.
Saýda jáne Integratsiia Ministrligi tutynýshylyq kóńil-kúi dinamikasyn qadaǵalap otyrý úshin áleýmettik saýalnamalar júrgizgen eken. Zertteýge qatysqan 10 myń respondent arasynda 65% adam meditsinalyq qyzmetterdiń sapasyna narazy bolǵan kórinedi. Internet-provaiderlerdiń qyzmetterine shaǵymdaný 52% bolyp shyqqan. Suraqqa jaýap bergen tutynýshylardyń 52% týristik qyzmet kórsetýde dórekilik jáne qyzmetkerlerdiń sapasyz qyzmet kórsetýi, buzylǵan tamaq, sanitarlyq-gigienalyq normalardy saqtamaý, memlekettik tilde mázirdiń bolmaýy siiaqty shaǵymdar aitqan.
"Qoǵamdyq birlestikterdiń aqparatyna súiensek elimizdiń ár qoǵamdyq birlestikterine kúnine kem degende 1 suraqpen nemese 1 aryzben tutynýshy habarlasady eken. Shamamen jylyna 6 myńnan asa aryzdardy elimizdiń qoǵamdyq birlestikteri qarap sheshimderin taýyp otyr eken. Aryzdar kóbinese turmystyq saýda bólshekter boiynsha, turmystyq qyzmet kórsetý men jumystardy óndirý boiynsha túsedi. Sonymen qatar tutynýshylar meditsina jáne turǵyn úi kommýnaldyq sharýa jóninde habarlasady eken. Alaida, qazirgi qoldanystaǵy Zańnyń keibir baptaryna sáikes tutynýshylardyń quqyqtaryn tolyq sheshýge múmkindikter joq ekenin aita ketý kerek", -dep otyr Ǵasyr sapasy qoǵamdyq birlestiginiń ókili Janna Biiatan.
Saýda jáne Integratsiia Ministrligi josyqsyz biznespen jumys isteýdiń aldyn alýǵa baǵyttalǵan zań jobalaryn ázirlep, ótken jyly Parlament Májilisiniń qaraýyna engizgen. Parlament depýtattary zań jobasyna oń qorytyndy bergen. Qazirgi ýaqytta Parlament Májilisinde shamamen 15 jumys toby ótkizilip, depýtattar zań jobasyna birqatar túzetýler engizgen. Otyrys barysynda depýtattardan birqatar usynystar túsken. Olar tutynýshylardyń quqyqtaryn qorǵaýdyń aqparattyq júiesi, elektrondy saýda bóliginde zań jobalarynyń erejelerin keńeitý jáne jeke habarlandyrýlardyń internet alańdarynda qoǵamdyq qatynastardy retteý týraly bolǵan.
