Energyprom.kz monitoring agenttiginiń aqparatyna sáikes, qant baǵasy bir jyl ishinde 61%-ke ósti, dep habarlaidy Sputnik Qazaqstan.
Biyl qańtar-sáýir ailaryndaǵy qant óndirisi 81,8 myń tonna boldy. Bul byltyrǵy sáikes kezeńmen salystyrǵanda 2,1%-ǵa az. Qanttyń úshten ekisinen astamy Jambyl oblysynda óndiriledi, iaǵni - 56,5 myń tonna.
"2022 jyldyń birinshi toqsanynyń qorytyndysy boiynsha otandyq qant óndirýshiler suranysty 39%-ǵa qamtamasyz etti. Byltyrǵy kórsetkish - 43,8%. Birinshi toqsanda qazaqstandyq óndiris bir jylda birden 25,2%-ǵa tómendedi, import 9%-ǵa, 60,1 myń tonnaǵa deiin qysqardy", - delingen aqparatta.
Nátijesinde 2022 jyldyń birinshi toqsanynda ishki naryqta 98,5 myń tonna qant satyldy. Bul bir jyl burynǵyǵa qaraǵanda 15,7%-ǵa az. Sektordaǵy eksport mardymsyz, ol 8 ese qysqardy. Biyl qant buryn-sońdy bolmaǵan dúrbeleń týdyrdy. Máselen, naýryzda Reseiden qant eksportyna tyiym salynýyna bailanysty reseilik qant quny Qazaqstanda aqpanmen salystyrǵanda birden 34,3%-ǵa ósti.
Saýda jáne integratsiia ministrligi aýyl sharýashylyǵy ministrligimen birlesip, elde qant tapshylyǵy joq jáne qalǵan qory úsh aiǵa jetedi dep málimdedi. Sonymen qatar olar únemi tolyqtyrylyp otyratynyn aitty, dep jazady Energyprom.kz.
Soǵan qaramastan, málimdeme jasalǵan ýaqytta túrli qala dúkenderinde sórelerde qant bolmady. Keiin alypsatarlyq jaǵdailary anyqtaldy. Qant baǵasynyń ósýi kelesi ailarda da jalǵasty: sáýirde qant taǵy 4,5%-ǵa, mamyrda 5,7%-ǵa qymbattady. Nátijesinde qanttyń jyldyq qymbattaýy birden 60,5% boldy.
Mamyr aiynda qant dúken sórelerinen qaitadan joǵalyp ketti. Saýda jáne integratsiia ministri Baqyt Sultanov eldegi qant tapshylyǵyn moiyndap, ony Resei tarapynan qant eksportyna engizilgen tyiymmen bailanystyrdy.
Eske salsaq, jýyrda aýyl sharýashylyǵy ministrligi elde qant tapshylyǵy joq ekenin, jetkizilim ýaqytynda júzege asyrylatynyn, al zaýyttar tolyq qýatynda jumys isteitinin málimdegen edi.
