AQSh-tyń Ogaio shtatyndaǵy Hemden aýylynda politsiia bir úiden jasy 18 ai men 18 jas aralyǵyndaǵy 16 balany aýyr jaǵdaida taýyp, qoǵamdy dúr silkindirgen oqiǵaǵa qatysty tergeýdi jalǵastyryp jatyr, dep habarlaidy ult.kz.
Oqiǵa 30 maýsym kúni basqa qylmystyq is boiynsha júrgizilgen tintý kezinde anyqtalǵan. Quqyq qorǵaý organdary úige kirgende balalardyń adam tózgisiz jaǵdaida ómir súrgenin kórgen. Resmi málimet boiynsha, olar birneshe jyl boiy óte tar bólmede oqshaýlanyp ómir súrgen. Úidiń ishi qoqysqa tolyp, antisanitariialyq jaǵdaida bolǵan. Keibir balalardyń sóileý qabileti tolyq damymaǵan, al úlkenderiniń biri óz esimin de jaza almaǵan.
Balalardyń jasy 18 aidan 18 jasqa deiin. Olardyń eshqaisysy mektepke barmaǵan, meditsinalyq baqylaýda bolmaǵan. Jeti bala aýrýhanaǵa jetkizilip, ekeýi tikushaqpen mamandandyrylǵan ortalyqtarǵa tasymaldandy. Keminde bir balanyń jaǵdaiy aýyr ekeni habarlandy. Qazir barlyq bala memleket qamqorlyǵyna alynǵan.
Tergeý barysynda balalardyń ata-anasy dep tanylǵan 36 jastaǵy er adam men 33 jastaǵy áiel, sondai-aq atasy men ájesi ustaldy. Olardyń árqaisysyna balalardyń ómiri men densaýlyǵyna qaýip tóndirdi degen aiyppen 16 bap boiynsha qylmystyq is qozǵaldy. Kúdiktiler taǵylǵan aiyptardy moiyndamaǵan. Tergeýshiler bul istiń adam saýdasyna qatysy joq ekenin, bul – bir otbasy ishindegi qatygezdik pen uzaq jyldarǵa sozylǵan oqshaýlaý deregi ekenin málimdedi.
Áleýmettik jelilerde taraǵan málimetterge sáikes, 33 jastaǵy áiel 15 jasynda turmysqa shyqqan, al alǵashqy júktiligi 13 jasynda bolǵan degen aqparat aitylýda. Alaida bul derekterdi quqyq qorǵaý organdary resmi túrde rastaǵan joq. Sondyqtan bul málimetter ázirge tek týystarynyń sózderi men áleýmettik jelilerdegi jazbalarǵa negizdelgen.
Qazirgi ýaqytta tergeý jalǵasyp jatyr. Mamandar balalardyń naqty qansha ýaqyt boiy osyndai jaǵdaida ómir súrgenin, olardyń týýy men tárbiesine qatysty barlyq mán-jaidy anyqtap jatyr. Bul oqiǵa AQSh-ta balalardyń quqyqtaryn qorǵaý júiesine qatysty qyzý talqylaýǵa sebep boldy.
