4 aqpan kúni Qazaqstan Respýblikasynyń Ulttyq qaýipsizdik komiteti men QR Syrtqy ister ministrligi birlese otyryp AQSh jáne ózge de halyqaralyq seriktesterdiń qoldaýymen qazaqstandyq bir top azamatty Siriiadan elge qaitarý operatsiiasyn ótkizdi, dep habarlaidy QR SIM.
QR SIM-nen málim etkendei, top quramynda 4 er adam, 1 áiel jáne 7 bala (2-eýi – jetim) boldy.
«Ulttyq zańnamaǵa jáne halyqaralyq mindettemelerge sáikes, terroristik is-áreketke qatysqan adamdar qylmystyq jaýapkershilikke tartylady. Jetim balalar jaqyn týystarynyń qamqorlyǵyna beriledi jáne memleket tarapynan olarǵa barlyq qajetti kómek kórsetiledi.
Áielder men balalar ońaltý jáne qaita áleýmettendirý baǵdarlamalarymen qamtamasyz etiledi», - dedi ministrlikten.
Terroristik áreketter belsendi júrgizilip jatqan aimaqtardan azamattarymyzdy qaitarý operatsiiasy - «Jýsan» operatsiiasynyń jalǵasy bolyp tabylady.
Eske salaiyq, «Jýsan» gýmanitarlyq operatsiiasynyń tórt kezeńi byltyrǵy aqpan aiynda qorytyndylanǵan bolatyn.
«2019 jyly QR Ulttyq qaýipsizdik komitetiniń úilestirýimen Siriiadan 595 Qazaqstan azamaty qaitaryldy. Operatsiianyń birinshi kezeńinde 47 adam, onyń ishinde 6 er adam, 11 áiel jáne 30 bala, ekinshi kezeńinde 231 adam, onyń ishinde 16 er adam, 59 áiel jáne 156 bala (18 jetim), úshinshi kezeńinde 246 adam, onyń ishinde 8 er adam, 67 áiel jáne 171 bala (9 jetim), tórtinshi kezeńinde 71 adam, onyń ishinde 3 er adam, 19 áiel jáne 49 bala (5 jetim) elge jetkizildi. Osylaisha, jalpy Siriiadan qaitarylǵandar sany – 595 azamat (33 er adam, 156 áiel, 406 bala (32 jetim)», - degen bolatyn QR Ulttyq qaýipsizdik komitetinen.
Keiin, qaqtyǵys aimaqtarynan Qazaqstan azamattaryn Otanyna qaitarý boiynsha sharalar jalǵasyn tapty. 7 jáne 9 mamyr kúnderi Siriiadan 231 Qazaqstan azamaty elge jetkizildi, onyń 156-sy – balalar. Osy oraida, Prezident Qasym-Jomart Toqaev málimdeme jasaǵan bolatyn.
