Astanada taǵy bir taksi júrgizýshisi týristti aldap ketti. Astana qalasynyń turǵyny Erkebulan Jumanovtyń aitýynsha, ondai jaǵdailarǵa sheteldikterdiń ózderi sebepshi bolyp jatady. Máselen, bir frantsýz Qazaqstannan keterde taksistke 60 teńgeni óz qolymen bere salǵan, dep xabarlaidy QazAqparat tilshisi.
"Negizi, sheteldikterdiń ózderi taksisterdi kóp aqshaǵa úiretip qoiady. Mysaly, meniń Tursyn deitin bir tanysym shetel azamatyn Táshenov kóshesinen áýejaiǵa aparyp tastaǵan. Sóitse, ol adam óz eline ketip bara jatyr eken. Qaltasyndaǵy barlyq teńgelerdi Tursynǵa bere salypty. "Frantsiiada bul aqshany ne qylamyn?" dedi de, bere saldy. Sanap qarasa, 60 myń teńge. Ol qýanǵannan birden mashinasyn qoiyp, "toilap" ketken. Sondyqtan bul jerde tek taksisterdi ǵana kinálaý durys emes. Jańaǵy oqiǵany estigender maǵan da sondai klient kezdesse eken dep oilaidy. Sheteldikti kórse, aqshany elestetedi. Sosyn neshe túrli qýlyqqa barady. Osylaisha, Tursynǵa aqshasyn berip ketken frantsýz siiaqty sheteldikter jergilikti taksisterdi qalai dániktirip qoiǵanyn ózderi de bilmeidi", - deidi Jumanov.
Onyń aitýynsha, sheteldikter kóp jaǵdaida taksi qyzmeti úshin kóp aqsha berip qoiǵandaryna mán bermeidi. Aldanyp qalǵandaryn bilse de, quqyq qorǵaý organdaryna aryz jazbaidy. "EKSPO-ǵa deiin bir frantsýzdardy 50 myń teńgege QazMunaiGazǵa deiin ákelip tastaǵan jigitter bar. Nemisterdi Nursaiaǵa 30 myń teńgege aparǵan taksister de boldy. Ondai jaǵdailar kóp qoi. Sol kezde aryz túspegennen keiin eshkimdi izdemeidi. Al osy jolǵy sheteldikter "taksany" salystyrǵan bolýy kerek, birden quqyq qorǵaý organdaryna xabar túsirdi. Árine, tártiptiń bolǵany durys. Biraq taksi aqysyn qymbat alý áreketteri bizde ǵana emes, barlyq jerde bar ǵoi", - dep atap kórsetti Erkebulan Jumanov.
Aita keteiik, elordada Germaniia azamaty politsiiaǵa aryzdandy. Shaǵymǵa sáikes, ony áýejaidan qonaq úige deiin aparǵany úshin 16 myń teńge alǵan. Buǵan deiin bir taksi júrgizýshisi Astanaǵa kelgen týristi qonaq úige aparǵany úshin 40 myń teńge alǵan. Sol úshin jumystan qýyldy. Artynan ol aqshany sheteldik azamatqa qaitaryp berdi.
