Polsha men Ýkraina shekarasynan ótip bara jatqan adamdar. Kórneki sýret.
Polsha shekara qyzmetiniń dereginshe, 16 sáýirde Ýkrainaǵa 22 myń adam oralǵan. Al sol kúni Ýkrainadan 19200 adam Polshaǵa ótken. Iaǵni, soǵys bastalǵan 24 aqpannan beri Ýkraina aýmaǵynan shyqqandar sanynan oralǵandar sany alǵash ret asyp otyr. Bul týraly VVS habarlady, dep jazady Azattyq.
Ýkrainaǵa oralǵandardyń kóbi týystarymen júzdesý úshin birneshe kúnge ǵana kelgen, olar shekara mańynan alysqa uzamaǵandy jón kóredi. Alaida elde qalý úshin oralyp jatqandar da bar. Ótken aptada Kiev meri Vitalii Klichko Resei armiiasy basqynshylyq shabýylyn jalǵastyryp jatqandyqtan, meken-jaiyn tastap ketýge májbúr bolǵan ýkrain azamattaryna úige oralý áli de qaýipti ekenin eskertken.
BUU dereginshe, Resei soǵys ashqaly beri Ýkrainanyń 4,8 mln-ǵa jýyq azamaty elden ketýge májbúr bolǵan. Sodan beri 650 myńnan astam adam Ýkrainaǵa oralǵan.
7 mln-nan astam adam úi-jaiyn tastap, eldiń shekara aimaǵyna qonys aýdarýǵa májbúr bolǵan.
