Qazaqstan ekonomikasyn monitoringileý jobasynyń mamandary taldaý júrgizip, aýyl halqynyń iri qara malmen qamtylý reitingin jasady. Oǵan sáikes, óńirler arasynda Batys Qazaqstan oblysy kósh bastady. Bul aimaqta bir adamǵa 0,4 siyrdan keledi.
Osy jyldyń ekinshi toqsanynda Qazaqstan halqynyń sany 18,5 million adamǵa jetti, onyń 41,7%-i – aýyl turǵyndary, dep habarlaidy Sputnik agenttigi energyprom.kz saityna silteme jasap.
Aýyl halqynyń basym bóligi Almaty jáne Túrkistan oblystaryna tiesili. Eki óńirdiń árqaisysynda 1,6 million adam turady, bul eldegi barlyq aýyl halqynyń 41%-ten astamy. Úshinshi orynǵa Jambyl oblysy jaiǵasqan. Munda 680 myńnan asa aýyl turǵyny bar.
Al 2019 jyldyń shilde aiynyń sońyndaǵy derekke súiensek, Qazaqstanda siyr sany 3,8 million basty quraǵan. Bul byltyr dál osy ýaqytta tirkelgen kórsetkishten 200 myńǵa artyq.
"2,1 million siyr halyq sharýashylyǵyna tiesili, bul eldegi barlyq siyr sanynyń 55,4%-i. Jeke kásipkerler, sharýa jáne fermer qojalyqtarynda 1,4 million bas nemese barlyq siyrdyń 37,1%-i shoǵyrlanǵan. Aýyl sharýashylyǵy kásiporyndarynda 7,5% nemese 284,7 myń bas siyr bar", keltirdi energyprom.kz zertteý málimetin.
Siyr sany jaǵynan Almaty oblysy kósh bastaǵan. Bul óńirde 553,6 myń bas siyr bar, ótken jylmen salystyrǵanda 40 myńǵa artqan. Ekinshi orynda – Shyǵys Qazaqstan oblysy (549,5 myń bas), al úshinshi orynda – Túrkistan oblysy (486,4 myń bas).
Osylaisha, zertteýge sáikes, Qazaqstan halqyn tutastai alǵanda, ár azamatqa siyrdyń besten bir bóligi keledi. Eger tek aýyl halqyn qarastyrsaq, ortasha statistikalyq eseppen, eki adamǵa bir siyrdan keledi.
"Siyr sany jaǵynan eń qamtylǵan óńir Batys Qazaqstan oblysy bolyp tur. Munda oblystyń ár turǵynyna 0,4 siyrdan keledi. Halyqtyń siyrmen qamtylý reitinginiń úshtigine Shyǵys Qazaqstan men Soltústik Qazaqstan oblystary engen – tiisinshe 0,4 jáne 036 siyr. Úzdik bestikti Aqmola (0,3) men Pavlodar oblysy (0,29) tuiyqtaǵan", - deidi zertteý avtorlary.
Mamandardyń paiymy kóńil kónshitpeidi. Olardyń pikirinshe, Qazaqstanda aýyl halqynyń sany ájeptáýir kóp bolǵanmen, aýyldyqtardyń iri qara malmen qamtylý deńgeii aitarlyqtai tómen. Mal eksporty jyl saiyn ulǵaiyp jatqanyn eskersek, bul bolashaqta et pen et ónimderiniń qymbattaýyna ákep soǵýy múmkin.
Dese de, sarapshylardyń pikirinshe, baǵanyń ósýine tosqaýyl qoiýǵa bolady. Ol úshin aýyl sharýashylyǵy ministrligi, qarjy ministrligi jáne basqa da múddeli memlekettik organdar maldy el aýmaǵynan shyǵarýǵa alty aiǵa tyiym salatyn buiryq jobasyn ázirleýi kerek.
Eki siyr tóńiregindegi áńgime Nur Otan partiiasy saiasi keńesiniń keńeitilgen otyrysynan keiin týyndaǵan edi. Sol joly tuńǵysh prezident Nursultan Nazarbaev memleketke alaqan jaiatyndardy synaǵan bolatyn. Elbasy kómek surai beretinderge "eki siyr satyp al da, ózińdi asyra" dep keńes berdi.
