Tájiribeli poliarlyq fotograf Ester Horvat taiaýda ǵana Antarktida jaǵalaýynan tabylǵan, muz qursaýynan 2 mil tómende jatqan osy kemeni sýretke túsirgen bolatyn.
National Geographic Qazaqstan jýrnaly Ester Horvattyń tuńǵiyqtan túsirgen sol tarihi sýretterin jáne nationalgeographic.com avtory Simon Ýorraldyń (Simon Worral) keme týraly materialynan qysqasha maǵlumat usyndy.
Aǵylshyn-irlandyq zertteýshi Ernest Sheklton bastaǵan ekspeditsiia mingen «Endurance» atty keme saparǵa 1914 jyly jeltoqsanda Ońtústik Georgiiadan shyqqan. Maqsaty – Ońtústik poliýske jetýdi kózdegen Sheklton bastaǵan zertteýshilerdi Antarktida jaǵalaýyna jetkizý. Alaida keme 1915 jyly qarashada Ýeddel teńizinde muz qursaýyna túsip, kúiregen. Keme batyp bara jatqanda muzǵa shyǵyp úlgergen ekspeditsiianyń 28 múshesiniń áýpirimdep júrip aman qalǵany óz aldyna bir hikaia.
Bir qyzyǵy, keme batqan tus shamamen belgili bolǵanymen, ony izdeý jumystary nátije bermegen edi. Endi mine, 1 ǵasyrdan astam ýaqyt ótkende Endurance22 ekspeditsiiasy ǵasyr jumbaǵyna ainalǵan kemeni Antarktidanyń tusynan, Ýeddell teńiziniń túbinen taýyp otyr. Kemeniń alǵashqy keskinderi 5 naýryzda avtonomdy súńgýir apparaty arqyly 2 mil shamasyndaǵy tereńdikten anyqtalǵan.
Kemeniń Endurance ekendigine eshqandai kúmán joq, óitkeni óte tómen temperatýra, otteginiń azdyǵy jáne kún sáýlesiniń joqtyǵy onyń jaqsy saqtalýyna septigin tigizgen. Fotoda onyń ataýy da anyq kórinip tur. Ǵalymdar kemeniń batqan orny belgili bola tura, uzaq ýaqyt boiy tabylmaýynyń sebebi onyń qursaýǵa túskennen keiin de muzdyń aǵysymen bastapqy ornynan jyljyp ketkendiginen deidi.
