QR Premer-Ministriniń orynbasary Eraly Toǵjanov Densaýlyq saqtaý ministrine «Qazaqstan halqyna» qory arqyly emdeletin balalardyń máselesin jeke baqylaýynda ustaýdy tapsyrdy, dep habarlaidy QazAqparat.
Vitse-Premer mundai tapsyrmany vedomstvonyń keńeitilgen alqa otyrysynda berdi.
«Memleket basshysy Qasym-Jomart Kemeluly ótkende halyqtyń densaýlyǵyn saqtaýǵa, jalpy meditsinalyq kómektiń sapasyn ári qarai arttyrýǵa qatysty naqty tapsyrmalar berdi. Sonyń alǵashqysy – «Qazaqstan halqyna» qoǵamdyq-áleýmettik qory týraly. Qazir ol jerde biraz qarjy jinaldy. Sondyqtan biraz negizgi aýrýlarǵa bailanysty usynystardy qaraý kerek. Onyń ishinde orfan dertine shaldyqqan balalarǵa kómek kórsetý boiynsha aimaqtarǵa tapsyrma berildi», - dedi Úkimet basshysynyń orynbasary.
Sondai-aq ol aýyr dertke shaldyqqan balalardyń qor qamqorlyǵynan tys qalmaýy kerektigin basa aitty.
«Osy máseleni ákimdiktermen birge shuǵyl qadaǵalaýda ustaý kerek. Bir de bir bala dalada qalyp qoimaýy kerek. Ajar Ǵiniiatqyzy, muny jeke baqylaýyńyzda ustaýdy suraimyz. Bir de bir bala qamqorlyqsyz qalmaýy kerek», - dedi Eraly Toǵjanov.
