Bir adamnyń birneshe bankten nesie alý múmkindigi bolmaidy. Bul týraly Májilis depýtaty Daniia Espaeva málim etti, dep habarlaidy QazAqparat.
Atap aitqanda, búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý máseleleri boiynsha ózgerister men tolyqtyrýlar engizý týraly» zań jobasy maquldandy.
Osy oraida internet-alaiaqtyqqa bailanysty táýekelderdi tómendetý jáne qaryz alýshylardyń boryshtyq júktemesiniń deńgeiin baqylaý maqsatynda kredittik biýrolarǵa aqparatty usyný merzimderin qaryzǵa bailanysty bazalyq málimetter boiynsha 15 jumys kúninen 1 jumys kúnine deiin qysqartý kózdelgen.
«Qazirgi kezde nesie alý salasynda alaiaqtyq jaǵdailary kóp kezdesedi. Nege osyndai faktiler kezdesedi? Árbir qarjylyq uiym nemese ekinshi deńgeidegi bankter berilgen nesieler týraly kredittik biýroǵa joldaidy, onda berilgen nesielerdiń bazasy 15 kúnniń ishinde qalyptasady. Bizdiń túzetýlerge sáikes, nesie berý aqparattary bir kúnniń ishinde tirkeledi. Endi, bir-eki kúnniń ishinde 5-6 bankte bir mezgilde nesie alýǵa tyrysqan adamdarda mundai múmkindik bolmaidy. Sebebi kredittik biýroda bul adamnyń bir bankte nesie alǵany týraly málimet tirkelip turady. Sáikesinshe, onyń qaryz júktemesi esepteledi», - D. Espaeva.
Osy oraida depýtat nesie alǵan adamnyń qaryz júktemesin eskere otyryp, basqa bank kredittik biýro bazasy arqyly bul málimetterdi kórip turatynyn aitty.
«Ekinshi bank qaitadan nesie alýǵa kelgen adamnyń múmkindigin qarap, onyń tabysy nesieni óteýge jetpeitinin kórip, onyń ótinishin maquldamaidy. Sonymen qatar, bul qadamdar internet-alaiaqtyqqa da tosqaýyl qoiady», - dedi Daniia Espaeva.
