Kooperativterge jaǵdai jasaý aýadai qajet. Bul týraly QR Parlamenti Senatynyń depýtaty Dúisenǵazy Mýsin málim etti, dep habarlaidy "Ult aqparat".
«Búginde jeke qosalqy sharýashylyqtardyń mártebesine arnalǵan normativtik-quqyqtyq baza qurý, kooperativterge jaǵdai jasaý aýadai qajet. Bul eń aldymen, ónimderdi deldalsyz ótkizýge jol ashady. Qazirgi ýaqytta óndirilgen ónimdi daiyndaý, bastapqy óńdeý, óńdeýshi kásiporyndarǵa jetkizýdiń júiesi joq. Sonymen qatar, servistik qyzmetter, iaǵni agrohimiia, veterinariia, fitosanitariia, melioratsiia jáne basqalarynyń deńgeileriniń tym tómendigi – salanyń ósýin tejeýshi faktorlardyń biri. Bul problemalardyń oń sheshim tabýy – tabys deńgeiine, azyq-túlik baǵasyn turaqtandyrýǵa yqpal eteri sózsiz», - dedi depýtat Senatta agroónerkásiptik keshendi damytý taqyrybyna arnalǵan parlamenttik tyńdaýda.
Onyń atap ótýinshe, mal sharýashylyǵyndaǵy maqsatty indikatorlarǵa qol jetkizý veterinarlyq ahýalǵa tikelei bailanysty. Saladaǵy biraz máseleler agroónerkásip keshenin retteý jónindegi zańda qaraldy. Degenmen, sharýashylyqtarda mamandar jetispeýde, «Diplommen aýylǵa» baǵdarlamasymen keiingi 3 jylda tek 254 mal dárigeri jumysqa ornalasty. Jyl saiyn 3,5 myń maman daiyndalsa, onyń 20 paiyzy ǵana er balalar.
«Asa qaýipti aýrýlarǵa qarsy preparattar tek sońǵy 3 jylda 12 mlrd teńgege shetelden satyp alynǵan. Bul máseleni sheshý úshin memlekettik biokombinattyń bolýynyń strategiialyq mańyzy zor.
Biopreparattar sapasy jóninde táýelsiz mekeme qajettigi depýtattyq saýalda da kóterilgen bolatyn. Epizootiialyq ahýal, memlekettik satyp alý, azyq-túlik jáne biologiialyq qaýipsizdikti retteý boiynsha usynystar Aýyl sharýashylyǵy ministrligi tarapynan nazarǵa alynyp, qarastyrylýy tiis», - dedi D. Mýsin.
Budan buryn habarlanǵandai, Dúisenǵazy Mýsin aýyl sharýashylyǵynda sýbsidiialaý erejeleriniń jii ózgerýi salanyń damýyna keri áserin tigizip jatqanyn aitty.
