Foto: pixabay.com
30 qańtarda senattyń jalpy otyrysynda depýtat Nurtóre Júsip eprodýktivti densaýlyq saqtaý salasyndaǵy jumysty ulttyq deńgeide júieleý jáne balalar men jasóspirimder arasynda tiisti aǵartý jumystaryn kúsheitý keregin aityp, depýtattyq saýal joldady. Bul týraly Ult.kz, Stan.kz aqparat agenttigine silteme jasap habarlaidy.
Senatordyń málimetinshe, keiingi bes jylda jasóspirimder arasynda týý kórsetkishi shamamen 1,5 ese artqan.
"Bul endi pandemiia kezinde bastalǵan eken. Keiingi tórt jylda bul úrdis bir deńgeide saqtalyp kele jatyr. 2023 jyly qarshadai qyzdar arasynda 5 094 bosaný faktisi tirkelip otyr. Bul sol kezeńdegi jalpy týý kórsetkishiniń 1,3 paiyzyn quraidy. Imandylyqtyń uiasy dep esepteletin aýyldyq jerde eki ese artyp otyr. Jap-jas qyzdardy qorlaý da kóbeidi, tipti zorlaý kóbeidi. Bul jaǵdai da erte júktilikke ákeledi. Biraq kóbine mundai oqiǵalar jabýly kúiinde qalyp, qyzdar ishinen tynyp qalady. Kórsek te, kórmegen bolyp, bilsek te bilmegen bolyp osylai otyra beremiz be?" – dedi senator.
Depýtat máselege kóz juma qaraýǵa bolmaitynyn atap ótti. Keiingi jyldardaǵy jaǵdai barlyq múddeli taraptardyń, ásirese bilim berý jáne densaýlyq saqtaý salalary ókilderiniń máselege belsendi aralasýyn talap etedi.
"Biz bul problemaǵa airyqsha nazar aýdarmai bolmaidy. Bul – óte názik áleýmettik másele. Bala kóteretin jasqa kelgen qazirgi jasóspirimderdiń reprodýktivti densaýlyq jaǵdaiy aldaǵy 10-15 jyldaǵy týý men demografiiaǵa tikelei áser etetini anyq. Oqý-aǵartý, densaýlyq saqtaý, eńbek jáne halyqty áleýmettik qorǵaý ministrlikteriniń, sondai-aq, osy salada jumys isteitin halyqaralyq uiymdardyń qatysýymen jasóspirimder arasynda júktilik pen týý sanynyń ósý sebepterine vedomstvoaralyq taldaý júrgizý qajet. Kámeletke tolmaǵandardyń quqyǵyn qorǵaýǵa qatysty zańnamanyń oryndalýyna monitoring pen baqylaýdy kúsheitý asa mańyzdy. Jasóspirimder men olardyń ata-analarynyń erte júktilik qaýpi, sondai-aq, kámeletke tolmaǵandardyń jaýapkershiligi men quqyqtary týraly habardar bolý deńgeiin arttyrýǵa baǵyttalǵan aqparattyq-túsindirý jumystaryn jedel qolǵa alý kerek", – dedi senator.
