Bilim jáne ǵylym ministri 2022 jylǵy túlekterdi mektep bitirýimen quttyqtady, dep habarlaidy "Ult aqparat" vedomstvonyń baspasóz qyzmetine silteme jasap.
Ashat Aimaǵambetov Nur-Sultan qalasyndaǵy №75 mektep-gimnaziiasyna baryp, sońǵy qońyraý merekesine arnalǵan saltanatty sapqa qatysty. Ol túlekterdi mektep bitirý kúnimen quttyqtap, pedagogterge eńbekteri jáne ata-analarǵa balalarǵa kórsetken qoldaýlary úshin alǵys aitty.
«Búgingi tańda oqýshylarymyz bilimimizdi, elimizdi halyqaralyq arenada laiyqty tanytyp júr. Mysaly, meniń qasymda kúni keshe ǵana Frantsiiadan oralǵan Dúniejúzilik gimnaziadanyń úsh jeńimpazy tur. Olar osy mektepte oqidy. Oqýshylarymyz 86 medal jeńip alyp, álemniń 70 eliniń arasynan ozyp shyǵyp, 3-orynǵa ie boldy. Al jeńip alǵan medaldardyń sany artyp keledi. Al endi túlekter ómirdiń jańa kezeńin bastaǵaly tur. Mektepti bitirseńiz de, oqý men izdenis jolynda eshqashan toqtamaý kerek. Bilim – eshqashan qunyn joǵaltpaityn, qunsyzdanýdan qoryqpaityn bailyq.
Alda emtihandar kútip tur. UBT eresek ómirdegi eń ońai emtihan ekenin bilseńizder eken. Ol úshin biz biylǵy túlekterge birqatar jeńildik jasadyq. Endi sizder UBT-ny eki ret tapsyryp, grantqa úmitker bola alasyzdar.
Biyl Prezidenttiń qoldaýynyń arqasynda granttar sanyn kóbeitip otyrmyz. Atap aitqanda, ýniversitetterde oqýǵa 73 myńǵa deiin jáne kolledjderde oqýǵa 128 myńǵa deiin grant bóldik. Jalpy alǵanda memleket sizderdiń bolashaqqa senimmen qaraýlaryńyz úshin tiisti sharalardy qabyldap jatyr», - dedi Bilim jáne ǵylym ministri Ashat Aimaǵambetov túlekterge.
Sondai-aq ministr óskeleń urpaqqa bilim men tárbie berip júrgen ustazdar men ata-analarǵa balalarǵa kórsetip júrgen qoldaýlary úshin alǵys aitty.
«Bizdiń oqýshylar, muǵalimder men ata-analar indet synaǵynan abyroimen ótti. Qyrkúiekte «mektepti ashý kerek pe?» degen másele qyzý talqylandy. Al endi qabyldanǵan sheshimniń durystyǵyna esh kúmán joq. Pedagogterimizdiń qajyrly eńbeginiń arqasynda biz búkil álem jáne bilim berý júiesi basynan ótkergen qiyn kezeńderdi eńsere aldyq. Áriptesterime eńbekteri men balalarymyzǵa kórsetip jatqan qoldaýlary úshin alǵys aitamyn. Árine pandemiia kezinde ońai bárine bolǵan joq. Degenmen ustaz eńbeginiń qanshalyqty mańyzdy jáne qundy ekenin túsingen ata-analar úlken qoldaý kórsetti», - dep atap ótti Aimaǵambetov.
Osydan keiin 1-synyp oqýshylary mektep bitirýshi túlekterge aq jol tiledi. Al óz kezeginde túlekter mektep qabyrǵasynda ótkizgen 11 jyly úshin ustazdary men ata-analaryna rahmetin aitty. Budan keiin túlekter qoshtasý valsin bilep, mektepte sońǵy qońyraý soǵyldy.
Nur-Sultan qalasyndaǵy №75 mektep-gimnaziiasynda 3 464 oqýshy bilim alady, onyń 201-i 11-synypty jáne 192-si 9-synypty aiaqtap otyr.
Jalpy biyl elimizde 3,6 mln oqýshy úshin sońǵy qońyraý soǵyldy. Onyń ishinde 170 myńnan astam 11 (12) synyp túlekteri, 302 myńnan astam 9-synyp oqýshylary. «Altyn belgi» tósbelgisine 8 139 úzdik oqýshy úmitker. Sondai-aq biyl 393 myńnan astam oqýshy 1-synypty aiaqtady.
