QR Bilim jáne ǵylym ministri Ashat Aimaǵambetov oqýlyq baǵasynyń qymbat ekenin moiyndady, dep habarlaidy QazAqparat.
«Men oqýlyq baǵasyna arnaiy taldaý júrgizdim. Bizde bastaýysh synyptar bazalyq oqýlyq paidalanady. Negizgi jáne joǵary synyptarǵa arnalǵan balama oqýlyqtar bar. Ekeýiniń baǵasyn salystyrdym. Bazalyq oqýlyqtardy basýǵa belgili bir baspalar múmkindik alyp otyrǵan. Sáikesinshe, baǵasy joǵary bolǵan. Al balamasy bar oqýlyqtardy 4-5 baspa shyǵarǵan. Bul jerde mektepter ózine tiimdisin tańdai alady. Osy báseke oqýlyq baǵasyna da áser etken. Iaǵni, bazalyq oqýlyqtar balamasy bar oqýlyqtarǵa qaraǵanda qymbat ekenin kóremiz», - degen ministr qazirgi baǵaǵa kóńili tolmaitynyn jetkizdi.
«Oqýlyq baǵasy boiynsha ministrliktiń ustanymy aiqyn. Ony eseptep shyqtyq. Qalamaqy tóleý kerektigin, bul biznes ekenin túsinemiz. Sonda da, oqýlyq baǵasy qazirgidei qymbat bolmaýy kerek. Biz pikir almasýlar arqyly osyǵan kózderin jetkizýimiz kerek. Iaǵni, baǵa saiasatynda ministrlik syrt qalmaýy kerek. Bizde buǵan deiin A4 qalypty jáne odan da kólemdi oqýlyqtar boldy. Endi elestetip kórińizder, birinshi synyp oqýshysy otyr deiik. Olardyń partalary shaǵyn bolady. Qasynda partalasy otyr. Jańaǵy kólemdi oqýlyqtar partaǵa syimai, balany áýrege túsiredi. Bir qaraǵanda bul usaq-túiek másele siiaqty. Biraq balanyń bilim alýynda róli orasan. Munyń báriniń artynda bilim berý sapasy men tiimdiligi tur. Jalpy búgingi oqýlyqtardyń jaǵdaiyna kóńili tolmaidy», - dedi ol.
Ashat Aimaǵambetov oqýlyq shyǵarý júiesine ózgeris engiziletinin atady.
«Salada júieli máseleler bar. Oqýlyq daiyndaý, onyń sapasyn saraptaý, irikteý júiesine ózgeris engizetin bolamyz. Sondyqtan, endigi oqýlyq basý kezeńinde men barlyq baspalarǵa osy aitylǵan máselelerdi eskerýdi tapsyramyn. Mundai bassyzdyqtarǵa jol berip qoia almaimyz. Naqty sheshimder qabyldap, júieli jumys júrgizetin kez jetti», - dep túiindedi ministr.
