Jańa oqý jylymen qatar qaita bastalǵan hidjab máselesine qatysty Bilim jáne ǵylym ministri búgin óz pikirin aitty. Ata-analardy ekige jaryp, qoǵamda qyzý talqyǵa túsken taqyrypqa Erlan Saǵadiev núkte qoiar dep úmittengen edik. Májilisten shyǵa sala jýrnalisterge suhbat berýden qashqan ministr “talap bárine ortaq” dep qutyldy. Sondai-aq, Qyzylorda oblysyndaǵy mektepterdiń birinde ýlanǵan oqýshylarǵa bailanysty da júrdim-bardym jaýap berdi. Bul týraly 31 arna habarlady.
«Meniń oramalyma bailanysty, sabaqqa direktorym kirgizbei jatyr. Men basqalar siiaqty mektepke oqyǵym keledi», – deidi 8-synyp oqýshysy Aqerke Amanjan.
Ótken aptada aryzyn aitqan Aqerkeniń máselesi qoǵamnyń talqysyna túsken edi. Azamattardyń biri mekteptiki durys dese, ekinshileri oqýshy qyzdy qoldap pikir talastyrǵan bolatyn. Mektepte hidjab kiiý taqyrybyna qatysty quzyretti organ ókilderi talai ret málimdeme jasasa da, jańa oqý jylynda bul másele qaitalanyp otyrady.
Kele salyp birneshe reformany qolǵa alǵan Bilim jáne ǵylym ministri tóreligin aitady-aý degen edik. Alaida, májilis otyrysynan shyǵa sala basqa jiynǵa asyqqan Erlan Saǵadiev, ekiushty jaýap qaitardy.
«Mektep direktorynyń máselesi. Sosyn ata-analar komiteti jinalyp, sheshýi tiis», – dedi ministr.
Mektep direktorynda mundai máselege bailanysty sheshim qabyldaityndai quzyret qaidan kelsin.
«Biz mektepke kirgizbei otyrǵan joqpyz, tek qana mekteptiń tabaldyryǵyna deiin oramalyńdy taǵyp kel, sodan keiin ishke kirerde oramalyńdy salǵyzyp, ishtegi balalarmen birdei bolyp otyrsyn degen talap qoiǵanbyz. Ony ata-ana durys túsinbei otyr. Biz nusqaýlyqqa bailanysty óz jumysymyzdy atqaryp otyrmyz, ishki tártibimizdi ustanyp otyrmyz», – deidi №21 mektep direktorynyń tárbie isi jónindegi orynbasary Balqash Jaqsieva.
Daýdyń sheshimi ainalyp kelip Bilim jáne ǵylym ministrine báribir tireldi. Májilis ǵimaratyn ainala qashyp qutylmasyn túsinse kerek, Saǵadiev myrza naqty óz kesimin aityp qutyldy.
«Belgilengen formasy bar. Sol belgilengen formamen balalar júrýge tiis. Mektepke barýǵa tiis», – deidi QR Bilim jáne ǵylym ministri Erlan Saǵadiev.
Al Qyzylordadaǵy mektepte oqýshylardyń ýlanýyna bailanysty quzyretti organdardyń tekserýi áli aiaqtalmapty. Aita keterligi, búgin aýrýhanaǵa jatqyzylǵan 6 balanyń 4-i emdelip shyǵypty. Qazaqstanda 7 jarym myń mektep bar degen bilim ministri, ár oqý oshaǵyndaǵy qaýipsizdik máselesine direktorlar jaýapty dedi.
