Elordada QR Bilim jáne ǵylym vitse-ministri bolǵan Elmira Sýhanberdievanyń soty ótip jatyr, dep habarlaidy "Ult aqparat".
Otyrystyń basynda sýdia Baqytjan Esenov sotqa qatysýshylardyń barlyq jeke málimetin jazyp aldy.
Elmira Sýhanberdievadan otbasy jaily suraǵanda: "Tórt balam bar. Úlkeni 26-da, odan keiingisi 17-de, bireýi 7-de jáne kishkentaiy 3-te... Úsheýi kámeletke tolmaǵan", - dedi kóz jasyna erik berip.
Aiyptalýshy óz kinásin tolyq moiyndady.
«Sýhanberdievanyń aiyby óziniń moiyndaýymen, kýágerler men kúdiktilerdiń túsiniktemesimen jáne qylmystyq istiń ózge de materialdary arqyly rastaldy (...) Kúdikti óz aiybyn tolyq moiyndady.
«QR Qylmystyq kodeksiniń 53-babyna sáikes, aiyptalýshy shyn nietpen ókinip, kinásin moiyndasa qylmystyq jaza jeńildeidi. Taraptar QR Qylmystyq kodeksiniń 55-baby, 3-bóligin qoldaný arqyly jaza taǵaiyndaýǵa kelisedi. E. Sýhanberdievaǵa qatysty 361-baptyń 3-bóligi boiynsha 2500 AEK kóleminde aiyppul men múlkin tárkileý, 364-baptyń 3-bóligi boiynsha belgili bir laýazymdardy atqarý nemese belgili bir qyzmetpen ainalysý quqyǵynan ómir boiyna aiyra otyryp, 2000 AEK aiyppul salý qajet», - dedi memlekettik aiyptaýshy Nurlan Bekmaǵambetov sot barysynda.
Onyń aitýynsha, qalyptasqan jaǵdaidy eskere otyryp, memlekettik aiyptaý burynǵy vitse-ministrge jeńildetilgen jaza qoldanýdy suraidy.
«QR Qylmystyq kodeksiniń 58-baby, 2-bóligin qoldanyp, Sýhanberdievaǵa 2500 AEK kóleminde aiyppul tóleý sharasy belgilensin. Sonymen birge, 2019 jyldyń 3 maýsymynda «Ortalyq» ekonomikalyq mektebi JShS direktorynyń qyzmettik kabinetinen alynǵan aiyptalýshynyń múlki men aqshalai qarajaty tárkilenip, memlekettik qyzmette, sotta, Ulttyq bankte, jergilikti ózin-ózi basqarý organdarynda jáne memleket úlesi 50% asatyn ózge de memlekettik organdarda - ulttyq holdingter, ulttyq damý institýttarynda jumys isteý quqyǵynan aiyrylsyn», - dep túiindedi N. Bekmaǵambetov.
Al Elena Sheverniaevaǵa prokýror 500 AEK kóleminde aiyppul salýdy usyndy.
Sot erteń sheshim shyǵarady.
Aita keteiik, Elmira Sýhanberdieva sybailas jemqorlyq kúdigimen ustaldy jáne 2 aiǵa qamaýǵa alyndy.
QR Sybailas jemqorlyqqa qarsy is-qimyl ulttyq biýrosy Elmira Sýhanberdievaǵa qatysty sotqa deiingi tergeý amaldaryn bastaǵan bolatyn.
