Nur-Sultan qalasynyń ákimi Altai Kólginov bilim salasyndaǵy sybailas jemqorlyq máselesi týraly pikir bildirdi, dep habarlaidy QazAqparat.
«Bilim salasynda jemqorlyq syn-qater kóp, sondyqtan qolǵa alǵan sharalar óz nátijesin berýi tiis. Biz ony qadaǵalaimyz. Memlekettik satyp alýlar boiynsha tamaqtaný salasy onlain rejimge aýysady. Bul máseleni «Astana - adaldyq alańynda» qarastyryp, ortalyq memorgandarǵa usynys jibergen edik. Menińshe, bul ózekti máseleni aitarlyqtai retke keltiremiz», - dedi ákim «ANTIKOR» ortalyǵynda ótken onlain konferentsiiada.
Onyń aitýynsha, bilim salasy boiynsha memlekettik satyp alýlarǵa óte kóp shaǵym túsedi.
«Jeke ózime bir jyl boiy kóptegen shaǵym men ótinishter kelip tústi. Sybailas jemqorlyqpen kúrestiń mańyzdy bóligi - adami faktordy azaitý bolǵandyqtan, oǵan tsifrlandyrý arqyly qol jetkize alamyz. Barlyq kelisimderdi alyp, barlyq memlekettik satyp alýdy onlain bastaǵanda, barlyǵy ashyq ári ádil kórinedi, osydan keiin ǵana nátije týraly aita alamyz. Tsifrlandyrý arqyly kóptegen máseleni sheshýge bolady. Munda Sybailas jemqorlyqqa qarsy qyzmetpen jáne prokýratýramen etene jumys istep jatyrmyz. Biz bilim salasyndaǵy senimdi nyǵaitqymyz keledi, óitkeni balalarǵa qatysty salada ońai oljaǵa jol bermeýimiz kerek. Eń aldymen, balalardyń qaýipsizdigin, tamaq sapasyn jáne ádildikti qamtamasyz etýimiz kerek», - dedi Altai Kólginov.
