QR Bilim jáne ǵylym ministrligi elimizdiń 6 joǵary oqý ornynda tekserý júrgizdi, dep habarlaidy "Ult aqparat" ministrliktiń baspasóz qyzmetine silteme jasap.
«2019 jylǵy 16-30 qyrkúiek aralyǵynda QR Bilim jáne ǵylym ministrligi tarapynan elimizdiń 6 joǵary oqý ornynda profilaktikalyq baqylaý júrgizildi: Ó.A.Baiqońyrov atyndaǵy Jezqazǵan ýniversiteti, akademik Q.Sátbaev atyndaǵy Ekibastuz injenerlik-tehnikalyq institýt, M.Tynyshpaev atyndaǵy Qazaq kólik jáne kommýnikatsiialar akademiiasy, D.Qonaev atyndaǵy Eýraziia zań akademiiasy, «Turan» ýniversiteti, Qazaq eńbek jáne áleýmettik qatynastar akademiiasy. Nátijesinde atalǵan joǵary oqý oryndarynyń bilim berý qyzmetinde ártúrli dárejedegi buzýshylyqtar anyqtaldy. Profilaktikalyq baqylaý qorytyndysy boiynsha belgili bolǵan sáikessizdikterdi joiý jáne bilim berý qyzmetin zańnama normalaryna sáikes keltirý boiynsha JOO-ǵa usynymdar berildi, biraq ákimshilik sipattaǵy sharalar qoldanylǵan joq», - delingen habarlamada.
JOO qyzmetin taldaý qoldanystaǵy normativtik quqyqtyq aktilerge sáikes júrgizilgen. Profilaktikalyq baqylaý barysynda bilim berý uiymdarynyń qyzmeti men oqýǵa qabyldaýdyń úlgilik erejeleri, biliktilik talaptary jiti tekserildi.
«Anyqtalǵan buzýshylyqtardy joiýǵa berilgen merzim óz shegine jetkennen keiin, ministrlikpen sáikessizdikterdi joiýdy baqylaý boiynsha qaita tekserý júrgiziletin bolady. Bilim berý salasyndaǵy zańnama talaptarynyń buzylý faktisi qaita anyqtalsa, JOO-ny bilim berý qyzmetin júrgizýge litsenziiadan aiyrý boiynsha materialdar sot qaraýyna jiberiletin bolady» - dep habarlady baspasóz qyzmeti.
