QR Bilim jáne ǵylym ministri Ashat Aimaǵambetov mektep túleginiń kásiptik baǵdaryn aiqyndaý jumysyn elimizdegi JOO-lar durystap júrgizip otyrmaǵanyn málim etti, dep habarlaidy QazAqparat.
«JOO-lardyń basty mindetteriniń biri – mektep túleginiń kásiptik baǵdaryn aiqyndaý. Eshkim de sizderdiń aldaryńyzda (ýniversitet basshylaryna qarata) mundai tapsyrmany qoimaýy da kerek. Sebebi bul - JOO basshysynyń árbiriniń aldynda turǵan eń negizgi mindetterdiń biri. Biraq kásiptik baǵdardy aiqyndaý jumysynyń jarnamaǵa ainalyp ketetini bar. Iaǵni, jyldyń aqpan aiynda «oiana qalyp», áriptesterimiz mektepti aralai ketse – biz ony kásiptik baǵdaryn aiqyndaý jumysy dep atai almaimyz. Sebebi aqpan – óte kesh. Oqýshylar oǵan deiin-aq óz mamandyqtaryn tańdap qoiady», - dedi Ashat Aimaǵambetov onlain rejimde ýniversitet basshylarymen ótkizgen onlain rejimdegi jiynda.
Ministr osy sebepti ýniversitetter kásiptik baǵdardy aiqyndaý jumysy júieli túrde júrgizilý kerektigin eskertti.
«Ol jumys joq degende 6-7 synyptan bastalýy tiis. Balalar sol kezden bastap sizderdiń JOO-laryńyzdy bilýi kerek. Oqýshy kezinde ol balalar sizderdiń baiqaýlaryńyz ben olimpiadalaryńyzǵa qatysýy kerek. Bul máselege búgingi kúnge deiin kóp kóńil aýdarylmai otyr. Ekinshiden jalpy túsinik te joq. Áitse de keibir ulttyq jáne óńirdegi ýniversitetter bul jumysty júrgizip te jatyr. Bárinde birdei jumys joq deýge kelmeidi. Biraq bul baǵytta naqty qalyptasqan júieli jumystyń joq ekenin biz ashyp aitýymyz kerek», - dedi ol.
Ashat Aimaǵambetovtyń aitýynsha mektepterdiń ár túlegi mamandyqty tańdaý kezinde naryqta oǵan suranys bar ma degen suraqtyń jaýabyn bilip alýy tiis.
«Ýniversitet tańdaý boiynsha kóp suraq bar. Bilim jáne ǵylym ministrligi «Atameken» palatasymen birge jasaǵan reiting bar. 2021 jyldan bastap sertifikattaý engizilip, ýniversitettiń bári memlekettik emes, óz diplomyn beredi. Onyń artynda úlken maǵyna jatyr. Ýniversitetter men bilim baǵdarlamalaryn qalai tańdaý kerek – bul máselelerge tiisti jaýap berilip otyrǵan joq. Balalar mamandyq tańdaý kezinde tiisti aqparatty taba almai otyr. Ol aqparat bolmaǵannan keiin bala árine mamandyqty durys tańdamaidy. Birinshi kýrstan keiin qanshama bala basqa mamandyqqa aýysyp ketip jatyr. Jalpy naryqta qajettiligi joq mamandyqtar boiynsha aqsha tólep oqyp jatqandar qanshama. Sondyqtan bul jumysty júieli túrde júrgizýimiz kerek», - dedi ol.
