QR Bilim jáne ǵylym ministrligine joǵary oqý oryndary litsenziialaryn qaitaryp alý jáne jabý quqyǵy berilýi qajet. Bul týraly búgin atalǵan vedomostvonyń basshysy Ashat Aimaǵambetov aitty, dep habarlaidy QazAqparat.
«Búginde sheshimdi sot qabyldaidy. Al biz memlekettik organ retinde litsenziia bergennen keiin ókiletti organ retinde atalǵan litsenziiany qaitaryp alý, aiyrý quqyǵymyz bolýy qajet. Bul norma taiaý arada beriledi dep úmittenemin», - dedi ministr Májilistiń jalpy otyrysynan keiin BAQ ókilderine bergen suhbatynda.
Onyń atap ótýinshe, mundai norma qazirgi ýaqytta Májiliste talqylanyp jatqan zań jobasynda kórinis tapqan.
«Májiliste ákimshilik kodekske ózgerister talqylanyp jatyr. Bul norma qabyldanady dep úmittenemin. Atalǵan normanyń qabyldanýy Bilim jáne ǵylym ministrligine JOO-lar biliktilik talabyna sai bolmaǵan jaǵdaida jedel ári tiimdi áreket etýine múmkindik beredi», - dedi ol.
Ashat Aimaǵambetovtiń dereginshe, búginde Qazaqstanda joǵary oqý oryndarynyń sany óte kóp.
«Bizde joǵary oqý oryndary óte kóp. Eger olar talapqa sai bolmasa, onda biz olardy jabamyz. Qazirgi ýaqytta stýdentterdiń basqa joǵary oqý oryndaryna aýysýyn aýyrpalyqsyz júrgizý múmkindikterin qarastyryp jatyrmyz. Sebebi munan stýdentter zardap shekpeýi qajet», - dedi ministr.
