Bilim jáne ǵylym ministri Ashat Aimaǵambetov pedagogikalyq joǵary oqý oryndaryn biriktirýge qatysty túsinikteme berdi, dep habarlaidy Sputnik Qazaqstan.
Ministrdiń aitýynsha, joǵary oqý oryndaryn biriktirýdiń negizgi maqsaty – bilim berý sapasyn kóterý. Sonyń nátijesin alty jyl buryn biriktirilgen ýniversitetterden de baiqaýǵa bolady.
"Máselen, 2013 jyly Qazaqstanda eki ýniversitet biriktirilgen bolatyn. Sonyń ishinde Aqtóbedegi pedagogikalyq institýt jáne Semeidegi pedagogikalyq institýt boldy. Biz osy sheshimniń tiimdiligin zerttep qaradyq. Aqtóbedegi ýniversitette ǵylymi ataǵy bar mamandardyń sany 45 protsentten 55 protsentke kóterildi. Ortasha jalaqysy da joǵarylady", - dedi Aimaǵambetov senattyń plenarlyq otyrysynda.
Onyń sózine qaraǵanda, Qostanai memlekettik ýniversitetiniń Qostanai pedagogikalyq ýniversitetimen, al Taraz memlekettik ýniversitetiniń Taraz pedagogikalyq ýniversitetimen biriktirilýi de sondai nátije beredi. Ǵylymi ataǵy bar qyzmetkerlerdiń jalaqysy ortasha eseppen 40 protsentke kóteriledi degen boljam bar. Budan bólek, jastar kóbirek barsyn degen maqsatta arnaiy kvota bólinip otyr.
Resmi málimetke sáikes, qazirgi kezde 85 ýniversitette pedagog mamandar daiarlanyp jatyr. Biyldyń ózinde 44 myń maman oqýdy bitirdi. Al bilim salasyna jyl saiyn 10-11 myń muǵalim qajet. Qazirgi kezde sanǵa emes, sapaǵa basymdyq berilip otyr. Sebebi mektepti úzdik bitirgen jastar pedagog mamandyǵyna kóp bara bermeidi. Al túsetinderdiń basym bóligi – UBT-dan tómen ball alǵandar.
"Búginde 85 ýniversitet pen 75 kolledj pedagog mamandardy daiarlaidy. Biraq olardyń sapasy syn kótermeidi. Sondyqtan biz kásibi talaptardy kúsheitip jatyrmyz", - dep atap kórsetti Aimaǵambetov.
Aita keteiik, buǵan deiin senator Edil Mamytbekov ministrge depýtattyq saýal joldap, Qostanai memlekettik ýniversitetiniń Qostanai pedagogikalyq ýniversitetimen, sondai-aq, Taraz memlekettik ýniversitetiniń Taraz pedagogikalyq ýniversitetimen biriktirilýine qatysty narazylyq bildirgen bolatyn.
"Qazaqstan táýelsizdik alǵanda árbir oblys ortalyǵynda 18 pedagogikalyq institýt bolǵan. Al 1994-1998 jyldary olardyń barlyǵyn basqa joǵary oqý oryndarymen biriktirip, ýniversitetke ainaldyryp jiberdi. Sonyń saldarynan "muǵalim" degen qyzmettiń mártebesi tómendep, mektepke deiingi, orta jáne arnaiy orta bilim salasynda maman tapashylyǵy týyndady", - dedi Mamytbekov.
Osy saýalǵa birneshe senator da qosyldy.
