Bilim jáne ǵylym ministri Ashat Aimaǵambetov barlyq ýniversitettiń rektorlaryna qashyqtan oqytý kezinde stýdentterge qoiylatyn talaptardy túsindirýdi tapsyrdy, dep habarlaidy "Ult aqparat".
Aita keteiik, búgin Bilim jáne ǵylym ministrliginiń apparat jinalysynda L.N. Gýmilev atyndaǵy Eýraziia ulttyq ýniversitetindegi qysqy emtihandar sessiiasyna daiyndyq taqyryby qaraldy.
«Tek qana bir ýniversitettiń ózinde qashyqtan oqytý formatyna kóshý úshin qomaqty qarjat bólindi. Iaǵni, qashyqtan oqytýǵa kóshý úshin biraz jumysty atqarý qajettigi boldy. Onyń ishinde tehnikalyq jumystar bar. Sondyqtan tek L.N. Gýmilev atyndaǵy Eýraziia ulttyq ýniversitetinde ǵana emes, basqa da oqý oryndarynda da aýqymdy jumystar qabyldandy», - dedi ministr.
Bul turǵyda ol bilim berý sapasyn tómendetip almaý qajettigin aitty.
«Dástúrli oqytý men qashyqtan oqytý formatyndaǵy sapa birdei dep aitý qiyn. Bizdiń aldymyzda turǵan basty maqsat – ol bul sapany tómendetpeý úshin barlyq qajetti jumystardy atqarý», - dedi vedomstvo basshysy.
Sonymen qatar ministr qysqy emtihandar sessiiasyna daiyndyq máselesine toqtaldy. Osy oraida paidalanylatyn júieni stýdentterge egjei-tegjei túsindirý tapsyryldy.
«Akademiialyq adaldyq qaǵidalaryn saqtaý mańyzdylyǵy bar. «Qashyqtan tapsyryp jatyrmyn, eshkim kórmei tur» dep kóshirip alý nemese basqa da máseleler bolsa, odan keiin ol stýdentterdiń nátijeleri bekitilmese, suraqtar týyndaityny belgili. Sondyqtan júielerdiń múmkindikterin, onymen jumys isteý tártibin, jaýapkershilik jaǵyn stýdentter arasynda túsindirý jumysyn júrgizýdi tapsyramyn. Ár ýniversitettiń basshylyǵy stýdentterge qatysty barlyq túsindirý jumystaryn atqarýy kerek», - dedi A. Aimaǵambetov.
