Bilim jáne ǵylym ministri Ashat Aimaǵambetov Premer-Ministr Asqar Maminniń tóraǵalyǵymen ótken QR Úkimetiniń otyrysynda Prezidenttiń «Jańa jaǵdaidaǵy Qazaqstan: is-qimyl kezeńi» atty halyqqa arnaǵan Joldaýynda aitylǵan bilim berý salasyndaǵy tapsyrmalarynyń iske asyrylýy týraly baiandady.
Memleket basshysynyń Joldaýynda elimizdi damytýdyń negizgi baǵyttary aiqyndalǵan. Bilim jáne ǵylym máselelerine erekshe nazar aýdaryldy.
«Prezidenttiń tapsyrmasy boiynsha biz úzdiksiz bilim berý tujyrymdamasyn qalyptastyrý, qashyqtan oqytý platformasy jáne 6 jasqa deiingi balalardy mektepke deiingi tárbiemen jáne oqytýmen 100% qamtýǵa qol jetkizý boiynsha jumys júrgizemiz», — dep atap ótti Aimaǵambetov.
Bul rette, qoldanystaǵy júieden aiyrmashylyǵy, memlekettik tapsyrysty endi bilim bólimderi nemese basqarmalary bólmeidi. Onyń ornyna balabaqshaǵa joldama alǵan balalardyń ata-analary mektepke deiingi uiymdy ózderi tańdaidy. Árine, osyndai básekelestik esebinen kórsetiletin qyzmetterdiń sapasy da ósýi tiis.
Qazaqstanda qashyqtan oqytý aiasynda 8 onlain-platforma jumys isteidi. Alaida, olardyń barlyǵy fýnktsionaly men múmkindikteri boiynsha erekshelenedi. Oqý protsesin tolyqqandy iske asyrý úshin QR BǴM bilim berýdiń onlain-platformalaryna biryńǵai talaptar ázirleidi.
Sondai-aq QR DSM-men birge barlyq sanitarlyq talaptardy saqtai otyryp, dástúrli oqytý formatyna kóshý tártibi ázirlenedi.
Muǵalimderdiń jalaqysyn 2021 jylǵy 1 qańtardan bastap 25%-ǵa arttyrý úshin Bilim jáne ǵylym ministrligi tiisti esepteýlerdi daiyndady jáne 2023 jylǵa deiin qarjylandyrý aiasynda Qarjy ministrligine engizildi.
«2020 jyldyń qyrkúieginen bastap, Prezident buǵan deiin tapsyrǵandai, synyp jetekshiligi úshin qosymsha aqy jáne dápterlerdi teksergeni úshin qosymsha aqy eki ese ósedi, al muǵalimniń magistrlik dárejesi úshin 27 myń teńge mólsherinde ai saiynǵy qosymsha aqy tólenedi», — dedi ministr.
Aýyl jáne qala mektepteri arasynda bilim berý sapasyn teńestirý maqsatynda júieli sharalar qabyldanýda. Shaǵyn jinaqty mektepterdiń pedagogtaryna eńbekaqy tóleý júiesin ózgertý usynyldy. «Mobildi muǵalim», «ýaqytsha otbasy» jobalaryn iske asyrý, myqty mektepterdiń álsizderge qamqorlyǵy, sondai-aq internattar salý josparlanýda.
Balalardyń quqyqtaryn qorǵaý máseleleri Prezidenttiń erekshe nazarynda. Elimizdiń habarlama rásimine qatysty Bala quqyqtary týraly Konventsiianyń Fakýltativtik hattamasyna qosylýy óte mańyzdy qadam bolady.
Balalardy kiberbýllingten qorǵaý, qosymsha bilim berý uiymdaryn damytýmen birge balalardyń sport sektsiialary men úiirmelerin jappai ashý ákimdikter men bilim berý uiymdary qyzmetiniń sózsiz basymdyqtaryna ainalady.
Oqýshylardy buqaralyq sport túrlerimen qamtýdy ulǵaitý jónindegi jumys jańa jáne júieli negizde uiymdastyrylady. Mektepterde sport zaldary salynyp, ulttyq jáne buqaralyq sport ligalary damidy.
Búgingi tańda úzdiksiz bilim berý tujyrymdamasyn daiyndaýǵa erekshe kóńil bólinýde. Biliktilikti berýdiń táýelsiz júiesi qaita qaralady.
Sondai-aq barlyq deńgeidegi bilim alýshylardyń kásipkerlik daǵdylaryn damytý boiynsha jumys júrgiziledi. Pánniń mazmuny eńbek naryǵynyń talaptaryn eskeredi.
Mektepter men joǵary oqý oryndarynda ekologiialyq tárbie jumystary bastaldy. Bilim alýshylardyń ekologiialyq mádeniet, ekologiialyq bilim jáne tárbie deńgeiin arttyrý úshin úzdiksiz bilim berýdiń keshendi modeli engiziletin bolady. Mektep baǵdarlamasyna ekologiia máseleleri engiziledi.
Prezident sondai-aq álsiz JOO-lar problemasyn tolyǵymen sheshýdi tapsyrdy. Ministrlik «diplom basyp shyǵaratyn» joǵary oqý oryndaryn jabý boiynsha júieli jumysty jalǵastyrýda. Jyl basynan beri stýdentter sany 35 myń JOO-lar sany qysqartyldy, 23 joǵary oqý ornynyń 56 litsenziiasy qaitaryldy. Talaptar kúsheitilýde. Joǵary oqý oryndaryna qarqyndy tekserýler júrgizilýde: 2020 jyldyń sońyna deiin 24 JOO tekseriledi.
Dástúr boiynsha Prezident ǵylymdy damytýǵa kóp kóńil bóldi. Ǵylymi jáne biznes-qoǵamdastyqpen birlesip, elimizdi ǵylymi-tehnologiialyq damytý boiynsha jeke baǵdarlamalyq qujat daiyndalady. Qazir 500 ǵalymnyń jetekshi ǵylymi ortalyqtarda ǵylymi taǵylymdamadan ótýi úshin konkýrstyq rásimder júrgizilýde. Sonymen qatar «Jas ǵalym» jas ǵalymdaryna qosymsha 1000 grant bólinedi.
Jer qoinaýyn paidalanýshylardyń ǵylym men tehnologiialardy damytýǵa 1% aýdarý jónindegi normany tiimdi iske asyrý jónindegi jumys júrgiziletin bolady.
«Bilim jáne ǵylym júiesi osy tapsyrmalardyń barlyǵyn joǵary deńgeide jáne ýaqytyly júzege asyrýy tiis», — dep túiindedi ministr.
