QR Bilim jáne ǵylym ministri Ashat Aimaǵambetov mektepterge kompiýter satyp alý jumystary qalai júrgizilip jatqanyn aitty, dep habarlaidy QazAqparat.
«Iri memlekettik satyp alýlar boiynsha aiqyn, ashyq sheshim qabyldaý algoritmi ázirlenetin bolady. Onda «Adaldyq alańy» men «Adal bilim» jobalyq keńselerimen ózara is-qimyl máseleleri kózdelgen. Mundai tájiribe qazirgi ýaqytta beiimdelip jatyr. Osy joly bizdiń áriptesterimiz kompiýterlik tehnika satyp alý barysynda osy jumystardy júrgizedi», - dedi ministr pedagogtar men bilim jáne ǵylym salasy qyzmetkerleriniń respýblikalyq tamyz keńesi barysynda.
Onyń naqtylai túsýinshe, memlekettik qarajatty igerý barysy tolyqtai ashyq jasalady.
«Memlekettik baǵdarlamalardy júzege asyrýǵa baǵyttalǵan barlyq qarajatty igerý jáne tolyqtai alǵanda bilim berýdi damytý memlekettik baǵdarlamasynyń árbir tarmaǵyna monitoring jasaý arnaiy saitta qoljetimdi bolady», - dedi Ashat Aimaǵambetov.
