QR Bilim jáne ǵylym ministri orta bilim salasynyń ókilderimen kezdesti, dep habarlaidy "Ult aqparat".
«Úzilisti qajet etpei, tórt jarym saǵat boiy áńgimelestik. Áriptesterim kókeilerinde júrgen saýaldaryn qoiyp, máselelerin ortaǵa saldy jáne ideialarymen bólisti. Kezdesýge qatysýshylar orta bilim berýdi damytý boiynsha óz usynystaryn aitty. Ádiskerlerdiń rólin arttyrý, rotatsiia institýtyn engizý, bilim berý uiymdarynyń basshylaryna qoiylatyn talaptardy kúsheitý, olardy taǵaiyndaý jáne attestattaý tártibin ózgertý qajettiligi týraly sóz qozǵaldy. Ustazdar «bilikti pedagogtar basshylyq laýazymdarǵa umtylýǵa qulyqty emes» deidi. Óitkeni direktorlardyń ailyǵy ustazdardyń eńbekaqysynan áldeqaida tómen. Degenmen, júkteletin mindet kóp, artylatyn jaýapkershilik joǵary», - dep jazdy ministr áleýmettik jelidegi paraqshasynda.
Osyǵan bailanysty A. Aimaǵambetov mektep basshylaryn taǵaiyndaý jáne olardyń jalaqysyn arttyrý boiynsha engiziletin ózgerister týraly aityp berdi.
«Aldaǵy ýaqytta osy jańashyldyqtar jaiynda tolyǵyraq jazatyn bolamyn. Kezdesý barysynda pedagogtardy attestattaý, saladaǵy tsifrlandyrý, pedagogikalyq etika normalaryn saqtaý, bilim berý baǵdarlamalary men oqýlyqtardyń mazmunyn jaqsartý, qashyqtan oqytýdy uiymdastyrý máseleleri, «Altyn belgige» úmitkerlerge qoiylatyn talaptardy kúsheitý jáne taǵy basqa ózekti máseleler kóterildi», - dedi ministr.
Onyń aitýynsha, jiynǵa qatysýshylar pedagog mártebesi artyp, jalaqynyń aitarlyqtai kóterilgenin alǵa tartty.
«Basqa da ózekti máselelerdi birge talqyladyq. Olardyń kópshiligi boiynsha tipti zańnamalyq deńgeide naqty sheshimder qabyldanǵan. Bul máseleler týraly da kelesi jazbalarymda tolyǵyraq aityp beremin. Kezdesýge qatysqan áriptesterime aitylǵan usynystary men qoiylǵan suraqtaryna alǵys aitamyn», - dedi A. Aimaǵambetov.
