Bilim jáne ǵylym ministri Ashat Aimaǵambetov kópbalaly analarǵa kvotamen grant berý bastamasyn túsindirdi, dep habarlaidy Sputnik Qazaqstan.
Ministrdiń aitýynsha, búginde bilim berý granttary taratylǵanda múgedekterge, ia bolmasa, jetim balalarǵa kvota beriledi. Týra sondai kvota kópbalaly analarǵa da bólinetin bolady.
"Mysaly, kópbalaly ana oqýǵa túsemin, grant alamyn dese, qujattaryn tapsyrady. Sol adamdarǵa arnalǵan kvota bolady. Kvotanyń ishinde olar oryndy jeńildikpen alady. Biraq ony alý úshin de ulttyq biryńǵai testileýdi tapsyrý kerek. Ol – bir. Ekinshiden, shekti baldy jinaý kerek. Sonda ǵana kvotaǵa tapsyrýǵa bolady. Degenmen, kvotaǵa tapsyrǵan adamdar da ózara básekege túsip, grant úshin talasady", - dedi Aimaǵambetov Úkimet kýlýarynda.
Onyń aitýynsha, ázirshe ondai kvotaǵa úlken suranys joq. Bul degenimiz, oqýǵa túsemin deitin kópbalaly analar az. Osyǵan bailanysty ázirshe kvotanyń kólemin 1 protsent deńgeiinde (barlyq memlekettik tapsyrystyń esebinen) bekitý qarastyrylyp otyr.
"Endi, búginde bul kvotaǵa úlken suranys joq. Biraq kópbalaly analarmen kezdeskende osyndai usynystar túsken. Jalpy, qazir kópbalaly analardy jumysqa tartýymyz kerek, olarǵa bilim berýimiz kerek dep aityp jatyrmyz ǵoi. Sondyqtan osy turǵyda kópbalaly analar oqimyz dese, biz ondai múmkindik berýge daiynbyz", - dep atap kórsetti Aimaǵambetov.
Aita keteiik, májiliste "Pedagog mártebesi týraly" zańdy tanystyrǵanda bilim ministri halyqtyń áleýmettik osal toptaryna arnalǵan kvotanyń bólinetinin aitqan. Ondai jeńildikke kópbalaly, tolyq emes, múgedek bala tárbielep otyrǵan otbasylar, "Altyn alqa" men "Kúmis alqamen" marapattalǵan analar ie bolady.
Qazirgi kezde bilim granttaryn taratqanda múgedekterge, jetim balalarǵa, soǵys ardagerlerine teńestirilgen azamattarǵa jáne ózge elden kelgen qandastarymyzǵa kvota beriledi. Biyl kópbalaly jáne jaǵdaiy tómen otbasylardan shyqqan balalarǵa da qosymsha 5 000 grant bólingen bolatyn.
