Bilim jáne ǵylym ministri Ashat Aimaǵambetov otandyq basylymdardyń birine bergen suhbatynda qashyqtan oqý qashan aiaqtalýy múmkin ekenin aitty. Qashyqtan oqý – álemdik tájiribege súiengen nátije ekenin, onlain oqýdyń artyqshylyǵy men kemshiligi, dástúrli oqý júiesine aýysý máselelerine toqtaldy, - dep habarlaidy «Ult aqparat».
Halyqaralyq tájiribeni zerdelei bastaǵan Bilim ministrligi barlyq talaptardy eskerýge tyrysyp jatqanyn jetkizdi.
«Álem boiynsha qashyqtan oqytýǵa qatysty barlyǵyna ortaq birneshe problemanyń bar ekenin kórip otyrmyz. Máselen, bizde qashyqtan bilim berýdiń sapasy tómen deidi. Óitkeni internettiń jyldamdyǵy baiaý. Alaida jaqsy interneti bar damyǵan memleketterdiń ózinde qashyqtan jáne dástúrli jolmen berilgen bilimniń arasynda úlken aiyrmashylyq bar», - dedi Bilim jáne ǵylym ministri Ashat Aimaǵambetov.
Negizi, bilim berý sinhrondy formattan buryn asinhrondy sipatta bolýy kerek. Bul – qashyqtan oqytý qaǵidattarynyń biri. Bul týraly ministr bylai deidi:
«Negizi, biz de mektepterdiń ashylǵanyn qalaimyz jáne balalardyń dástúrli formatta bilim alǵanyn qoldaimyz. Iá, muǵalimder úshin arnaiy kýrstar uiymdastyryldy. Degenmen, olardyń jańa formatta jumys isteý daiyndyǵyna qatysty másele bar.
Bul jumys atqarylyp jatyr. Ótken aptada men baspalar, avtorlar men sarapshylarmen keńes ótkizdim. Avtorlar men sarapshylar úshin ýniversitetterde arnaiy kýrstar uiymdastyryldy. Bul jerde mańyzdy bir máseleni eskerý kerek, myqty mamandardyń barlyǵy birdei didaktika men pedagogika jaǵynan jaqsy oqýlyq shyǵara bermeidi. Avtorlarǵa da kómek pen qoldaý qajet. Oǵan qosa, mektepterde ádisteme de, oqý baǵdarlamalary da ózgerdi. Sondyqtan barlyq oqýlyq saraptama men aprobatsiiadan ótýi kerek. Sol jerde muǵalimder, sarapshylar men avtorlar bárin qaraidy, talqyǵa salady, bir sheshimge kelip, ózgeris engizedi» dedi ministr.
Sondai-aq, aita keteiik, qashyqtan oqytý 12 jyldyq bilim berýge kóshý josparyn shegermeidi. Jumystar kezeń-kezeńimen atqarylyp jatyr.
«Biz osy jumysty 12 jyldyq bilim berý júiesine kóshý sharalarymen úndestirýimiz kerek. Áitpese, eki jumys bolyp ketedi, biýdjetten artyq shyǵyn shyǵady. Bala birinshi synypqa barǵan kezde jańa oqýlyqtardy da alýy tiis. 12 jyldyq bilim berýge kóshý jospar boiynsha atqarylyp keledi», - dedi Bilim ministri.
Osy oraida aita keteiik, qashyqtan oqý birneshe jylǵa sozylýy múmkin, úsh jylǵa deiin dástúrli oqýǵa oralmaýymyz múmkin degen áńgimeler el arasynda tarai bastady. Bilim ministrligi bul áńgimeni qaýesetke balap, joqqa shyǵardy.
«Men sizderge naqtysyn aitaiyn, qashyqtan oqytý úsh jyl bolmaidy. Biz birtindep dástúrli bilim berý formasyna kóshýdi josparlap otyrmyz. Sońǵy sheshimdi bas sanitarlyq dáriger qabyldaidy. Dál qazir ol sheshimniń qai kezde shyǵatynyn aita almaimyn. Ázirshe, qashyqtan oqytýdy tek birinshi toqsanda ǵana qaldyrýǵa usynys jasaldy. Endi, respýblika boiynsha 7 myń mekteptiń barlyǵy tolyp turǵan joq. Basym bóligi bir aýysymmen jumys isteidi. Sosyn shaǵyn jinaqty mektepter bar. Máselen, aýyl mektepteri jartylai bos tur. Ondai mektepter jylda jabylady, sebebi bala joq, adamdar aýyldan qalaǵa kóship jatyr. Sodan qaladaǵy mektepter balaǵa tez tolyp ketedi» dedi ministr.
Aita keteiik, osyndai jaǵdaida oqýshy kóp bolsa, mektep infraqurylymy da soǵan sai bolýy qajet. Sport zaldary, ashana, kompiýterlik tehnika – bári-bári bala sanyna sáikes jasalaýy shart. Eger mektepte 25 balaǵa bir kompiýter kelse, onda tsifrovizatsiia týraly aitýdyń ózi qisynsyz.
Esterińizge sala keteiik, biyl 2020-2021 oqý jylynda 3,3 million oqýshy bilim alýǵa kiristi. Olardyń ishinde birinshi synypqa barǵan 352 myń bala bar.
