QR Bilim jáne ǵylym ministri Ashat Aimaǵambetov ýaqytsha qashyqtan oqytýǵa kóshý sheshimine bailanysty pikir bildirdi, dep habarlaidy "Ult aqparat".
«Sońǵy ýaqytta mektepterde oqý protsesi qalai uiymdastyrylatyny týraly kóptegen suraqtar kelip túsýde, óitkeni tórtinshi toqsannyń bastalýyna nebári on kún qaldy. Adamdardyń boiynda, ásirese, osyndai qiyn kezeńde, jańa ári belgisiz nársege degen qorqynysh seziminiń bolýy – qalypty jaǵdai. Fors-majorlyq jaǵdaida bilim berý salasynda bolyp jatqan protsester bizge tek paidasyn tigizedi dep sendirgim keledi. Biz syni pikirlerdi estip te, kórip te otyrmyz. Degenmen, qashyqtan bilim berýge kóshý – koronavirýstyq infektsiianyń taralýyn azaitýǵa baǵyttalǵan sharalar aiasynda júzege asyp jatqanyn barlyǵy túsingeni jón. Ókinishke qarai, basqa tańdaý joq. Oqý protsesi toqtatylmaýy tiis», - dep jazdy ministr áleýmettik jelidegi paraqshasynda.
Osy oraida A. Aimaǵambetov ministrlik osyndai jaǵdaiǵa tap bolǵan basqa elderdiń tájiribesin aldyn ala zerdelegenin atap ótti. Is júzinde olardyń barlyǵy qashyqtan oqý rejimine kóshken, iaǵni búkil álem boiynsha 870 millionnan astam oqýshy osyndai formatta bilim alýda.
«Barlyq múmkindikterdi, aspektiler men táýekelderdi jan-jaqty oi eleginen ótkize otyryp, biz de ýaqytsha qashyqtan oqytýǵa kóshý týraly sheshim qabyldadyq. Birinshiden, teledidar arqyly sabaq ótkizý. Bul - tipten jańa format. «Balapan» jáne «El Arna» telearnalary bizge ózderiniń efirlik ýaqytyn usyndy. Túsirilim jumystary bastalyp ketti. Negizgi pánder boiynsha 2000-nan astam beinesabaq túsirý qajet. Men keshe túsirilim jumystary júrgizilip jatqan stýdiiada boldym. Stsenarii jazýshylardan, rejisserler men pedagogterden turatyn jumys toby árbir shyǵarylymdy muqiiat pysyqtaýda. Bizdiń ustazdar telejúrgizýshi retindegi múldem jańa róldi meńgerýde. Beinesabaqtar qazaq jáne orys tilderinde jazylýda. Bul ońai is emes ekenin birden aitqym keledi», - dedi vedomstvo basshysy.
Ekinshiden, arnaiy mamandandyrylǵan internet-platformalary arqyly sabaqtar ótkizý qarastyrylǵan. Bul tsifrlyq júieler oqýshylarǵa ótken sabaqty nemese buryn talqylanǵan taqyrypty qaita qaraýǵa, sondai-aq onlain-sabaq ótkizýge, keri bailanys ornatýǵa, jeke dara oqytý men tapsyrmalardy geimifikatsiialaýǵa zor múmkindik beredi.
«Sonymen qatar, bul format testileý jumystaryn ótkizýge jáne alǵan bilimderin baǵalaýǵa múmkindik jasaidy. Buryn mundai kompaniialardyń bilim berý kontentine qol jetkizý aqyly bolsa, osy kezeńde bizdiń balalar barlyq kerek aqparatty jáne platformalardy tegin paidalana alady. Tiisti kelisimge qol jetkizdik. Sondai-aq, biz internet-provaiderlerimen osy resýrstardy paidalanǵan kezde trafik eseptelmeitindei kelisim ornattyq», - dep naqtylady Ashat Aimaǵambetov.
