Budan bylai ata-analar bilim basqarmalary men bólimderimen tikelei bailanysa alady. Bul múmkindik arqyly árbir bilim bóliminiń nemese bilim basqarmasynyń basshysy máselelerdi ýaqytyly jáne sapaly sheshýi kerek. Bul týraly QR Bilim jáne ǵylym ministri Ashat Aimaǵambetov áleýmettik jelidegi paraqshasynda bilim basqarmalary men bólimderi basshylarynyń telefon nómirin jariialai otyryp, málimdedi, - dep habarlaidy «Ult aqparat».
«Árbir bilim bóliminiń nemese bilim basqarmasynyń basshysy týyndaǵan máselelerdi óz deńgeiinde ýaqytyly jáne sapaly sheshýi qajet. Óńirdegi salaǵa qatysty barlyq jaǵdaidan habardar bolyp, halyqtyń suraǵyna der kezinde jaýap berýi tiis. Sondyqtan basshylardyń barlyǵyna óz WhatsApp nómirlerin jariialap, kelip túsken suraqtar men týyndaǵan máseleler boiynsha sheshimderdi shuǵyl qabyldaý tapsyryldy», - dep jazdy ministr Ashat Aimaǵambetov Facebook paraqshasynda.
Biyl Qazaqstanda jańa oqý jyly qashyqtan oqytý formatynda bastaldy. Dese de, bastaýysh synyp oqýshylary úshin mektepterde kezekshi synyptar ashyldy. Shalǵai aýyldarda da balalar mektepke baryp oqyp júr. Al ministrlik tarapynan bolǵan jańalyq ata-analar úshin óte qolaily bolyp otyr. Bul týraly Almaty qalasynda turatyn kóp balaly ana Farida Jarqymbek óz oiymen bólisti.
«Meniń bes balam bar, onyń tórteýi mektep qabyrǵasynda oqidy. Keide máseleler týyndap jatatyny ras. Mundai jaǵdaida bilim basqarmalary men bilim bólimderimen tikelei bailanysa alatynymyz qýantyp otyr. Óitkeni árbir oqýshy úshin mektep qana emes, ata-analar da, bilim basqarmalary men bilim bólimsheleri, kerek deseńiz Bilim jáne ǵylym ministriligi de jaýapty dep sanaimyn. Telefondardyń ashyq bolýy bul ata-analarmen tikelei qarym-qatynastyń ornaýy ǵoi. Sodyqtan oǵan tek qana qýanamyz, árine», - deidi Farida Jarqymbek.
Aita keteiik, biyl álem memleketteri úshin aýyr synǵa toly jyl boldy. Pandemiia kezinde barlyq elder onlain oqytý júiesine kóshti. Kóktemde elimizde jariialanǵan tótenshe jaǵdaiǵa bailanysty, ótken oqý jylynyń tórtinshi toqsany qashyqtan oqytý formatynda ótti. Tájiribege sáikes, onlain oqytý baǵdarlamalyq júieler men tele-sabaqtar arqyly júzege asyrylady. Qashyqtan bilim berý salasynda jumys isteitin «Bilimland», «DDaryn.online», «Kúndelik», «Univer», «Platonus», «EduPage», BIL, «BTS education», «U-study» jáne «AGS» syndy uiymdardyń ókilderi jáne pedagog-ádiskerler, mektep direktorlary men oqý isi jónindegi orynbasarlary jáne JOO prorektorlary birigip, arnaiy jumys tobyn qurdy. Joǵaryda ministrlik usynǵan jańalyqtarǵa qatysty Mańǵystaý oblysy, Aqshuqyr mektep-litseiiniń qazaq tili men ádebieti pániniń muǵalimi Marat Qani da óz oiymen bólisti.
«Iá, ministr Ashat Aimaǵambetovtiń búgin tańda jasap jatqan reformalaryn kemel keleshekke jetýdiń bastamasy desek bolady. Jalǵyz meniń emes, oǵan ustazdardyń kóbi dán riza. Kezdestirip qalǵan qai muǵalimnen surasańyz da qazirgi ózgerister jaily jyly pikirler aitatyny sózsiz. Eski aidyń bitip, jańa aidyń bastalatyn shaǵyn qazaq «óliara» deidi eken. Qazirgi qazaqstandyq pedagogtardyń shynaiy mártebesi – osyndai.
Atalǵan zań birqalypty ótip jatqan muǵalimderdiń ómirine oń ózgeris ákeldi. Birinshi, jappai qaǵazbastylyqtan qutqardy. Endi bolmaityn bir qujat úshin aýdan men oblystan sabylyp keletin komissiianyń joly kesildi. Ekinshi, eńbekaqy máselesi sheshildi. Úshinshi, ashqannyń alaqanynda, jumǵannyń judyryǵanda júretin dáýren ótti. Ata-analardyń tikelei bailanys ornata alýy óte qýantarlyq jaǵdai», - dedi Marat Qani.
Esterińizge sala keteiik, QR Bilim jáne ǵylym ministri Ashat Aimaǵambetov áleýmettik jelidegi paraqshasynda bilim basqarmalary men bólimderi basshylarynyń telefon nómirin jariialai otyryp, budan bylai ata-analar bilim basqarmalary men bólimderimen tikelei bailanysa alatynyn málimdegen bolatyn.
