Biyl ulttyq biliktilik testileýden 160 myń muǵalim ótedi. Bul týraly Bilim jáne ǵylym vitse-ministri Sholpan Qarinova málim etti, dep habarlaidy QazAqparat.
Ulttyq biliktilik testileýdi ótkizý máseleleri boiynsha BǴM ótkizgen onlain baspasóz máslihatynda Sholpan Qarinova bul syn - jalpy bilim salasy, muǵalimder men pedagogikalyq mamandar úshin óte mańyzdy suraq ekenin atap ótti.
«Barshańyz biletindei, elimizde «Pedagogtar mártebesi týraly» zań qabyldanyp, muǵalimderdiń naqty mindetteri aiqyndalǵanyn, júktemelerin azaitýǵa bailanysty ministrdiń birneshe ustanymyn buǵan deiin jetkizgen edik. Zań aiasynda birneshe normativtik-quqyqtyq qujattar qabyldandy.
Ulttyq biliktilik testileý – jalpy muǵalimdi attestattaýdyń eki kezeńiniń birinshisi. Birinshi kezeńi – ádettegidei testileý arqyly ótkiziledi. Testileý kezinde muǵalimder óz pánderine bailanysty biliktiligin kórsetedi. Ádisteme boiynsha suraqtarǵa jaýap berip, attestattaýdyń ekinshi kezeńine joldama alady», - dedi vitse-ministr.
Onyń aitýynsha biyl ulttyq biliktilik testileýge 160 myńǵa jýyq muǵalim qatysady.
«Biyldan bastap JOO-lardyń pedagogikalyq mamandyqtary boiynsha túlekteri osy testileýge qatysa alady. Testileýdiń ekinshi kezeńi muǵalimniń eńbegin keshendi taldaý boiynsha ótkiziledi. Onyń nátijesinde muǵalimderdiń bári de óz eńbekaqylaryn 1 qyrkúiektan bastap 30-dan 50 paiyzǵa deiingi aralyqta ósire alady. Bul – muǵalimdi qoldap, eńbegin baǵalaýǵa bailanysty jumystar. Sondyqtan ulttyq biliktilik testileýdiń mańyzy joǵary. Ústimizdegi jyldyń 2 maýsymy kúni úrdis barlyq óńirde bastaldy», - dedi ol.
