Bilik qańtar oqiǵasyna qatysty barlyq shyndyqty aityp otyr. Bul týraly búgin Parlament Májilisiniń tóraǵasy Erlan Qoshanov málim etti, dep habarlaidy QazAqparat.
Spiker qańtar oqiǵasy kezindegi oq atý máselesi týraly qoiylǵan saýalǵa jaýap berdi.
«Bul týraly Memleket basshysy Qasym-Jomart Kemeluly Toqaev halyqqa úndeýinde jariialaǵan bolatyn. Negizinde sheshim Qaýipsizdik Keńesinde qabyldandy. Biz ony durys túsinýimiz kerek. Óitkeni bul – terroristik shabýyl. Qaýipsizdik Keńesinde terrorizmge qarsy operatsiia degen túsinik bar. Soǵan sáikes sheshim qabyldandy. Onda áskerilerdiń, quqyq qorǵaý organdarynyń ómirine, memlekettiń konstitýtsiialyq qurylymyna, adamdardyń densaýlyǵyna qaýip tóngen jaǵdaida oq atýǵa ruqsat berilgen. Sol kezeńde memlekettiń taǵdyry qyl ústinde turdy. Prezidenttiń, Qaýipsizdik Keńesiniń sheshimi bolmaǵanda, bári basqasha bolar edi», - dedi Erlan Qoshanov Májiliste tilshiler saýalyna jaýap bere otyryp.
Sonymen qatar Májilis tóraǵasy tergeý amaldarynyń ashyq ári jariia túrde júrip jatqanyn aitty.
«Bilik qańtar oqiǵasyna qatysty barlyq shyndyqty aityp otyr. Eshbir jasyryp qalǵan másele joq. Tergeý bastalǵanyna eki-aq ai boldy. Bul – óte aýqymdy terakt. Myńdaǵan adam qatysty. Máselen, Norvegiiada 70-80 adam óltirgen Breiviktiń isi bir jylǵa jalǵasty. Al bizde mundai aýqymdy oqiǵa bolmaǵan. Sondyqtan máseleniń mán-jaiyn anyqtaý úshin naqty dálelder men ýaqyt qajet. Bul – úlken ári jaýapty jumys», - dedi palata spikeri.
