Bilektiń kúshimen kendi qazyp, dalaǵa shyǵaratyn qazaq bolmai, aqylmen aqsha tabýdyń jolyna túseiik. Bul týraly búgin «Jańa indýstriialandyrý: qazaqstandyq barystyń qadamy» ulttyq telekópiri barysynda Memleket basshysy Nursultan Nazarbaev aitty, dep habarlaidy QazAqparat.
«Indýstriia, innovatsiia degen nárse árkim «jasaimyn» degennen keiin jasalmaidy. Ol úshin tiisti qarajat kerek. Ol úshin mamandar kerek. Ol úshin memleket daiyn bolýy kerek. Minekei, biz 2010 jyly ǵana daiyn boldyq. 2008-2009 jyldardaǵy dúniejúzilik daǵdarystan, qarjy daǵdarysynan, ekonomikalyq daǵdarystan shyqtyq. Munaidyń baǵasy barreline 10 dollarǵa túskenin de kórdik. Ol ary-beri aýytqyp turatyndyǵyn da kórdik. Shikizat baǵasynyń bir orynda turmaityndyǵyn, keide kóteriletindigin, keide túsetindigin kórdik. Al adamnyń ómiri ondai emes qoi. Búgin biz halyqqa, mysaly 300 myń teńge jalaqy tóleitin bolsaq, erteńgi kúni «munaidyń baǵasy tómendedi» dep 100 myń teńge bere almaimyz ǵoi. Zeinetaqy da solai. «Munai tómendep ketti, senderge zeinetaqyny úsh ese azaityp beremiz» dep aita almaimyz», - dedi Qazaqstan Prezidenti.
Sondyqtan Memleket basshysy munai men gazdyń aýmaly-tókpeliligin tómendetý úshin ne isteý kerektigin aitty.
«Búkil álemdegi siiaqty ekinshi ekonomika jasaýymyz kerek. Ózderińiz qarap otyrsańyzdar, aldyńǵy qatarly memleketterde, Ońtústik Koreiada munai men metall turmaq 1 túiir kómir de joq. Singapýrda qandai kómir, temir, munai-gaz bar? Shveitsariiada, Germaniiada ne bar? Biraq aqylmen, oimen aldyńǵy qatarly elderdiń leginde boldy. Sondyqtan biz bilektiń kúshimen jerdi qazyp, qoparyp, kendi dalaǵa shyǵaratyn qazaq bolmai, jurt siiaqty aqyl-oimen, parasatpen aqsha tabýymyz kerek. Men kórgen Izrailde, Tel-Avivte turǵan zaýyt osy biz otyrǵan kishentai zal siiaqty. Jyl saiyn 10 mlrd dollar aqsha tabady... Biz keń dalamyzda kenniń bárin qazyp, shyǵaryp, qatyryp jatyrmyz dep oilaimyz. Sondyqtan biz qiyn bolsa da indýstriialyq baǵdarlamany qolǵa aldyq. Bul bizdiń bolashaǵymyz. Bul - elimizdiń órkendegen memleketter qataryna qosylý joly. Bul - bizdiń kadrlardy daiyndaýdyń máselesi. Endeshe, jastardy basqasha jumys isteýge daiyndaý kerek. Bir sózben aitqanda, bul - qazaqtyń bolashaǵy. Osyny eske alyp, jolǵa túsýimiz kerek. Biraq ne bolsa sony jasamai, kerekti, básekege qabiletti dúnielerdi shyǵarýymyz qajet», - dedi Nursultan Nazarbaev.
