Búgin elordanyń Halyqaralyq áýejaiynda shahmattan álem chempiony Bibisara Asaýbaevany kútip alý issharasy ótti. Jas shahmatshyny jaqyndary men jankúierleri ystyq yqylaspen qarsy alyp, gúl shoqtaryn syilady, dep habarlaidy QazAqparat.
Bibisarany jarqyn jeńisimen quttyqtaýǵa QR Mádeniet jáne sport ministrligi Sport jáne dene shynyqtyrý isteri komitetiniń tóraǵasy Samat Erǵaliev áýejaiǵa arnaiy bardy. S.Erǵaliev Bibisaranyń jetistigine anasynyń qosqan úlesin erekshe atap ótip, alǵysyn bildirdi.
«Shahmattan álem chempionatynda eń jas álem chempiony atanyp, jarqyn jeńisimen qazaq elin qýantqany úshin Bibisaraǵa alǵysymdy bildiremin. Bibisaranyń jeńisine anasynyń qosqan úlesi zor. Otandasymyzdyń bul jeńisi barsha shahmatshylarǵa úlgi bolyp, el sportynyń tarihynda qalary sózsiz», - dedi komitet tóraǵasy.
«Týrnir ońaiǵa soqpady. Úsh kún rapid, eki kún blits, bes kúnge sozylǵan jarysta sońyna deiin tabandylyq kórsetý kerek boldy. Men birinshi taqtada oinap rapidte sońǵy partiiany jeńip, ekinshi oryndy ielendim. Blitste segizinshi ainalymnan bastap, kósh bastadym. Aqtyq kezeńge deiingi ainalymda aiqyn basymdylyqpen birinshi orynǵa kóterildim. El tarihynda eresekter arasyndaǵy shahmattan alǵashqy altyn júldeni jeńip alǵanym úshin óte baqyttymyn», - dedi shahmattan Álem chempionatynyń jeńimpazy.
QR Sport jáne dene shynyqtyrý isteri komitetiniń baspasóz qyzmeti Polsha astanasy Varshava qalasynda ótken Álem chempionatynda 17 jastaǵy qazaqstandyq shahmatshy Bibisara Asaýbaeva blitste birinshi oryndy jeńip alyp, álemdik shahmat tarihynda áielder arasynda eń jas shahmatshy atanǵanyn eske salady. Sondai-aq atalǵan chempionatta Bibisara jyldam shahmattan (Rapid) 2-oryn ielendi.
