Qazaq shahmatshysy Bibisara Asaýbaeva Ginnestiń rekordtar kitabyna endi. 17 jasynda eń jas Álem chempiony atanǵan Bibisaraǵa atalǵan uiym arnaiy sertifikatyn da joldady, dep habarlaidy "Ult aqparat" mádeniet jáne sport ministrliginiń baspasóz qyzmetine silteme jasap.
«Qazaqstandyq Bibisara Asaýbaeva (2004 jyly 26 aqpanda dúniege kelgen) – blitsten áielder arasynda eń jas Álem chempiony. Bibisara 2021 jyldyń 30 jeltoqsanynda Polshanyń Varshava qalasynda blitsten áielder arasynda ótken Álem chempionatynda 17 jasynda jeńiske jetti»- delingen resmi qujatta.
Esterińizge sala keteiik, otandasymyz Polsha astanasy Varshava qalasynda ótken álem chempionatynda blitste birinshi oryndy jeńip alyp, álemdik shahmat tarihynda áielder arasyndaǵy eń jas shahmatshy atanǵan edi.
Sondai-aq atalǵan chempionatta Bibisara jyldam shahmattan (rapid) 2-oryndy ielendi. Sheshýshi partiialarda Bibisara grýziialyq tájiribeli shahmatshy - grossmeister Naný Dzagnidzeni, óz otandasy Ásel Serikbaidy jeńip, chempionattyń jeńimpazy halyqaralyq grossmeister Aleksandra Kosteniýkpen teń oinady.
Aita keteiik, Qazaqstan tarihynda tuńǵysh ret eresekter arasyndaǵy álem chempionatynyń triýmfatory atanǵan Bibisara 2004 jyly 26 aqpanda Taraz qalasynda dúniege kelgen.
