Kollaj: prosports.kz
Belgili shahmatshy, blitsten eki dúrkin álem chempiony Bibisara Asaýbaeva Instagram paraqshasynda Niý-Delidegi Gran-pri týrniri qarsańynda týyndaǵan daýǵa núkte qoiýǵa daiyn ekenin meńzep, jazba qaldyrdy, dep habarlaidy QazAqparat.
«Úndistandaǵy Gran-pri jarysynda bolyp jatqan beibereketsizdikti «kóbelek effektisine» teńeýge bolady. Bir jaǵala serpilgen qanattan týyndaǵan «tsýnami» qarsy jaǵadaǵy bizdi jaýyp qaldy. Keshe men áńgimelegen bir epizod endi ne isteýimiz kerektigin túsine almaityndai saldarǵa ákeldi.
Keshe men qyzbalyqqa salynǵan shyǵarmyn (ol úshin ózime tiesili heitter legin alyp úlgerdim de). Sóz joq, sýyq sananyń aldynda júretin emotsiialar da biraz dúnieni búldirýi múmkin. Bul bárimizge sabaq bolsyn. Shahmatshyǵa birneshe qadamdy aldyn ala oilaý kerek – ásirese ómirde sondai qabilettiń bolǵany jaqsy. Óitkeni ómirdegi qateliktiń quny shahmat taqtasynan áldeqaida joǵary. Qatelesken bolsam, moiyndaýǵa daiynmyn», - dedi ol.
Sondai-aq, ol qazir eń áýeli týrnirdi abyroimen aiaqtaýǵa ǵana múddeli ekenin atap ótti.
«Biraq qazir men bir ǵana nárseni qalaimyn: Niý-Delide bolyp jatqan dúnieler esh jerde bolmasa eken. Salǵyrt uiymdastyrý da, uiqy qanbaý da, kóz jasy da, daý-damai da, qursaýly belgisizdik te, bitip bermeitin, jalǵan úmit syilaityn ýádeler de bolmasa eken.
Shahmat oinap, rekordtar ornatyp, elimniń abyroiyn asyryp, jaqyndarymdy qýantqym ǵana keledi. Biz bul jerge sol úshin kelgen edik qoi. Bizge sondai múmkindik beredi de dep úmittenem.
Qasietti Ramazan aiynda oiyńnyń taza, nietińniń igi bolǵany airyqsha mańyzdy. Bireýlerdiń namysyna tisem, keshirim suraimyn. Ondai maqsatym bolǵan joq. Laiyq adam jeńiske jetsin!», - dep jazdy shahmatshy.
Eske salaiyq, qazaqstandyq shahmatshylar Bibisara Asaýbaeva men Jansaia Ábdimálik Niý-Delide (Úndistan) ótip jatqan shahmattan Gran-pri týrnirindegi jaǵdaiǵa bailanysty janjaldasyp qalǵan bolatyn.
Artynsha, Halyqaralyq shahmat federatsiiasynyń (FIDE) prezidenti Arkadii Dvorkovich Úndistanda ótken áielder Gran-priiniń 11 qatysýshysyna jergilikti uiymdastyrýshylar jibergen qatelikter úshin keshirim surap, hat joldady. Qazaqstandyq Jansaia Ábdimálik hat joldanǵan shahmatshylar qatarynda joq.
