كوللاج: prosports.kz
بەلگٸلٸ شاحماتشى, بليتستەن ەكٸ دٷركٸن ەلەم چەمپيونى بيبٸسارا اساۋباەۆا Instagram پاراقشاسىندا نيۋ-دەليدەگٸ گران-پري تۋرنيرٸ قارساڭىندا تۋىنداعان داۋعا نٷكتە قويۋعا دايىن ەكەنٸن مەڭزەپ, جازبا قالدىردى, دەپ حابارلايدى قازاقپارات.
«ٷندٸستانداعى گران-پري جارىسىندا بولىپ جاتقان بەيبەرەكەتسٸزدٸكتٸ «كٶبەلەك ەففەكتٸسٸنە» تەڭەۋگە بولادى. بٸر جاعالا سەرپٸلگەن قاناتتان تۋىنداعان «تسۋنامي» قارسى جاعاداعى بٸزدٸ جاۋىپ قالدى. كەشە مەن ەڭگٸمەلەگەن بٸر ەپيزود ەندٸ نە ٸستەۋٸمٸز كەرەكتٸگٸن تٷسٸنە المايتىنداي سالدارعا ەكەلدٸ.
كەشە مەن قىزبالىققا سالىنعان شىعارمىن (ول ٷشٸن ٶزٸمە تيەسٸلٸ حەيتتەر لەگٸن الىپ ٷلگەردٸم دە). سٶز جوق, سۋىق سانانىڭ الدىندا جٷرەتٸن ەموتسييالار دا بٸراز دٷنيەنٸ بٷلدٸرۋٸ مٷمكٸن. بۇل بەرٸمٸزگە ساباق بولسىن. شاحماتشىعا بٸرنەشە قادامدى الدىن الا ويلاۋ كەرەك – ەسٸرەسە ٶمٸردە سونداي قابٸلەتتٸڭ بولعانى جاقسى. ٶيتكەنٸ ٶمٸردەگٸ قاتەلٸكتٸڭ قۇنى شاحمات تاقتاسىنان ەلدەقايدا جوعارى. قاتەلەسكەن بولسام, مويىنداۋعا دايىنمىن», - دەدٸ ول.
سونداي-اق, ول قازٸر ەڭ ەۋەلٸ تۋرنيردٸ ابىرويمەن اياقتاۋعا عانا مٷددەلٸ ەكەنٸن اتاپ ٶتتٸ.
«بٸراق قازٸر مەن بٸر عانا نەرسەنٸ قالايمىن: نيۋ-دەليدە بولىپ جاتقان دٷنيەلەر ەش جەردە بولماسا ەكەن. سالعىرت ۇيىمداستىرۋ دا, ۇيقى قانباۋ دا, كٶز جاسى دا, داۋ-داماي دا, قۇرساۋلى بەلگٸسٸزدٸك تە, بٸتٸپ بەرمەيتٸن, جالعان ٷمٸت سىيلايتىن ۋەدەلەر دە بولماسا ەكەن.
شاحمات ويناپ, رەكوردتار ورناتىپ, ەلٸمنٸڭ ابىرويىن اسىرىپ, جاقىندارىمدى قۋانتقىم عانا كەلەدٸ. بٸز بۇل جەرگە سول ٷشٸن كەلگەن ەدٸك قوي. بٸزگە سونداي مٷمكٸندٸك بەرەدٸ دە دەپ ٷمٸتتەنەم.
قاسيەتتٸ رامازان ايىندا ويىڭنىڭ تازا, نيەتٸڭنٸڭ يگٸ بولعانى ايرىقشا ماڭىزدى. بٸرەۋلەردٸڭ نامىسىنا تيسەم, كەشٸرٸم سۇرايمىن. ونداي ماقساتىم بولعان جوق. لايىق ادام جەڭٸسكە جەتسٸن!», - دەپ جازدى شاحماتشى.
ەسكە سالايىق, قازاقستاندىق شاحماتشىلار بيبٸسارا اساۋباەۆا مەن جانسايا ەبدٸمەلٸك نيۋ-دەليدە (ٷندٸستان) ٶتٸپ جاتقان شاحماتتان گران-پري تۋرنيرٸندەگٸ جاعدايعا بايلانىستى جانجالداسىپ قالعان بولاتىن.
ارتىنشا, حالىقارالىق شاحمات فەدەراتسيياسىنىڭ (فيدە) پرەزيدەنتٸ اركاديي دۆوركوۆيچ ٷندٸستاندا ٶتكەن ەيەلدەر گران-پريٸنٸڭ 11 قاتىسۋشىسىنا جەرگٸلٸكتٸ ۇيىمداستىرۋشىلار جٸبەرگەن قاتەلٸكتەر ٷشٸن كەشٸرٸم سۇراپ, حات جولدادى. قازاقستاندىق جانسايا ەبدٸمەلٸك حات جولدانعان شاحماتشىلار قاتارىندا جوق.
