Nur-Sultan qalasynda álemdik opera primadonnasy Bibigúl Tólegenovanyń 90 jyldyq mereitoiyna arnalǵan kesh ótti, – dep habarlaidy «Ult aqparat».
«Astana Opera» teatrynda ótken merekelik sharaǵa B.Tólegenovanyń shaqyrtýymen qazaqstandyq tanymal opera ánshileri, izbasarlary, Bibigúl Tólegenova baiqaýynyń laýreattary qatysty.
«Búgin Tuńǵysh Prezidentimiz - Elbasy Nursultan Ábishuly Nazarbaevtyń bastamasymen salynǵan «Astana Opera» teatrynda áigili ánshi, ańyz adam Bibigúl Ahmetqyzy Tólegenovanyń mereitoiyna orai keremet kesh ótýde. Sizdi shyǵarmashylyq keshińizben shyn júrekten quttyqtaimyn. Jyl boiy, álemniń ár buryshynan sizdiń atyńyzǵa myńdaǵan hat kelip túsýde. Bibigúl Ahmetqyzy, sizge QR Prezidenti Qasym-Jomart Kemeluly Toqaevtyń quttyqtaýyn oqyp berýge ruqsat etińiz» degen QR Mádeniet jáne sport ministri Aqtoty Raiymqulova Memleket basshysynyń jáne QR Parlamenti Senatynyń tóraǵasy Dariǵa Nazarbaevanyń quttyqtaý hattarynan jyly lebizderdi oqyp berdi.
Qazaqtyń bulbul ánshisi óziniń aýqymdy repertýarynan birqatar nómirlerdi oryndady. Atap aitqanda, E.Brýsilovskiidiń «Qyz Jibek» operasynan Jibektiń (Gákký) ariiasy, G.Týkaidyń sózine jazylǵan tatardyń «Taftiliaý» áni, N.Lysenkonyń «Natalka-Poltavka» operasynan Natalkanyń ariiasy shyrqaldy.
«Sizderge zor densaýlyq, baq-bereke, molshylyq tileimin, qýanyshty kúnderimiz kóp bolsyn, Qudai Taǵala bizge qaiǵy kórsetpesin, elimizde beibitshilik bolsyn, barlyǵymyz aman bolaiyq. Men kóp qiynshylyqty, sonyń ishinde Uly Otan soǵysyn da, ashtyq pen kedeilikti de kórdim. Sondyqtan bizdiń qazirgi ómir súrip jatqan ýaqytymyz – jumaq deýge bolady. Búgingi keshime kóp adam jinaldy – bul úlken baqyt, munyń bári bizdiń Tuńǵysh Prezidentimiz N.Nazarbaevtyń arqasy. Ol halyq úshin kóp jaqsylyq jasady. Bul týraly umytpaýymyz qajet» dedi Bibigúl Tólegenova.
