QR Bilim jáne ǵylym ministri Ashat Aimaǵanbetov tarihshy ǵalymdarmen kezdesti. Bul týraly ol Facebook-tegi paraqshasynda habarlady.
«Almaty qalasynda tarihshy ǵalymdarmen jáne tarih pániniń muǵalimderimen kezdestim. Jiyn barysynda Memleket basshysynyń «Táýelsizdik bárinen qymbat» atty maqalasynda mindettegen tapsyrmalaryn oryndaý barysyn talqyladyq» dep jazdy ministr.
El Prezidenti Qasym-Jomart Toqaev Qazaqstan tarihy boiynsha jańa akademiialyq basylymdy, sondai-aq Qazaqstan tarihy páni boiynsha biryńǵai oqýlyqtardy daiyndaýdy tapsyrǵan bolatyn.
«Ǵalymdarmen jáne muǵalimdermen Qazaqstannyń tarih ǵylymyn damytý tujyrymdamasyn ázirleý máseleleri, Qazaqstan tarihy boiynsha jańa akademiialyq basylymdy, Qazaqstan tarihy boiynsha bazalyq mektep oqýlyǵyn daiyndaýdyń uiymdastyrýshylyq jáne ádisnamalyq máseleleri, mektepterde tarihty oqytý problemalary, onyń ishinde úlgilik baǵdarlama daiyndaý týraly máseleler talqylandy. Bul ortaq jumystyń mańyzy zor.
Bul jumysta naýqanshyldyq pen asyǵystyq bolmaý kerek ekeni de túsinikti» delingen habarlamada.
Vedomstvo basshysy ministrlik tarihshy ǵalymdar men muǵalimderdiń aitqan usynystary men ideialaryn eskeretinin atap ótti.
«Joǵaryda atalǵan baǵyttar boiynsha jumysqa barlyq tarihshylardy qatysýǵa shaqyramyn. Óz usynystaryńyzdy Ǵylym komitetiniń korporativtik poshtasyna kn@edu.gov.kz jiberýdi suraimyn» dep túiindegen sózin Ashat Aimanbetov.
