Bilim jáne ǵylym vitse-ministri Qýanysh Erǵaliev Arizona ýniversitetiniń prezidenti doktor R. Robbinspen jáne AQSh-tyń Arizona shtatyndaǵy Ókilder palatasynyń spikeri R. Baýerspen onlain-kezdesý ótkizdi, dep habarlaidy "Ult aqparat" BǴM baspasóz qyzmetine silteme jasap.
Kún tártibinde strategiialyq seriktestik jáne Qozybaev atyndaǵy SQÝ bazasynda Arizona ýniversitetiniń filialyn ashý máseleleri talqylandy.
Esterińizge sala keteiik, osyǵan deiin Prezident Qasym-Jomart Toqaev sheteldik joǵary oqý oryndarynyń filialdaryn ashý boiynsha jumys júrgizýdi tapsyrǵan bolatyn.
Kezdesý barysynda taraptar aldaǵy birlesken jumys barysyn talqylady. Arizona shtaty Ókilder palatasynyń tóraǵasy R. Baýers jobany jan-jaqty qoldaýǵa daiyn ekenin málimdedi jáne bilim berý sapasyn arttyrýdaǵy strategiialyq seriktestiktiń mańyzdylyǵyn atap ótti.
Vitse-ministr Q. Erǵaliev atalǵan jobany iske asyrý úshin normativtik quqyqtyq qujattarda qabyldanǵan ózgerister týraly aityp berdi. Taraptar bilim berý qyzmetin júzege asyrý, oqytýshylyq qyzmetke sheteldik ǵalymdardy tartý tártibin jáne litsenziialaý máselelerin talqylady.
Bilim salasy, IT, injeneriia, agro-tehnikalyq jáne t. b. baǵyttar boiynsha oqytý AQSh-ta akkredittelgen bilim berý baǵdarlamalary boiynsha aǵylshyn tilinde júrgiziledi degen ýaǵdalastyq bar.
Negizgi basymdyq qosdiplomdy baǵdarlamalar men birlesken ǵylymi zertteýlerdi damytýǵa berilip otyr. Sondai-aq halyqaralyq professorlar men biznes-qaýymdastyq ókilderi jumyldyrylady.
Endi 2022 jyldyń qyrkúieginen bastap Arizona ýniversitetimen birlesken jumysty bastaý úshin strategiialyq yntymaqtastyqty bekitetin normativtik quqyqtyq qujatty qabyldaý kerek.
