Bilim jáne ǵylym ministrliginde Almaty ákimdigine bilim berý salasyna bailanysty qosymsha ókilettik berý týraly sheshim qabyldandy. Bul týraly vedomstvo basshysy Ashat Aimaǵambetov Facebook-tegi paraqshasynda jazdy, - dep habarlaidy "Ult aqparat".
«Jýyrda Memleket basshysy Almaty qalasynyń mańyzdy nysanynyń biri – Oqýshylar saraiynda boldy. Prezident balalarmen áńgimelesip, onda jasalǵan jaǵdaimen jáne saraidaǵy jańǵyrtý jumystarynyń nátijesimen tanysty. Almatyda qosymsha bilim berýdi damytý jumystary jaqsy jolǵa qoiylǵanyn atap ótkim keledi.
Atap aitqanda:
- Qoldanystaǵy Oqýshylar saraiyn tolyqtai jańǵyrtyp qana qoimai, sonymen birge zamanaýi eki innovatsiialyq shyǵarmashylyq ortalyǵy paidalanýǵa beriledi.
- Kelesi jyly eski ǵimarattardy buzyp, 3 oqýshylar úiiniń qurylysyn salý josparlanyp otyr. Qazirgi kúni jobalaý jumystary bastalyp ketti.
- Mektepterdiń sport alańdaryn qaita jańǵyrtý jumystary júrgizilýde.
- Jas týrister men natýralister (tabiǵattanýshy) stantsiialary jańartylady.
- Memlekettik bilim berý, shyǵarmashylyq jáne sporttyq tapsyrystar ornalastyrylýda.
Jalpy, qazirgi tańda Almaty qalasy ákimdiginde basqa óńirlermen salystyrǵanda bilim salasyn damytýda barynsha birtutas jáne dáiekti saiasat júrgizilip jatqanyn moiyndaý kerek» dep jazdy ministr Facebook paraqshasynda.
Sol sebepti qala basshylyǵynyń salany damytý ustanymyn, megapolistiń qolda bar qarjylyq múmkindikteri men kadrlyq áleýetin eskere otyryp, ministrlik Almaty qalasynyń ákimdigine bilim berý salasynda qosymsha ókilettikter berý týraly sheshim qabyldaǵan.
«Ministrliktiń normativtik aktilerde arnaiy sharttar men quzyretterdi qarastyramyz. Sonymen qatar qalanyń bilim berý uiymdary bizdiń negizgi innovatsiialyq alańdarymyzǵa ainalady. Óz tarapynan ákimdik barlyq jańa bastamany qarjylai jáne uiymdastyrýshylyq jaǵynan qoldaýǵa mindetteme alady. Al ministrlik barlyq jariialanǵan mindettemeniń oryndalýyn baqylaýda ustaidy» dep túiindedi ol.
