Elimizdegi kolledjderdiń bilim berý qyzmetine qatysty júrgizilgen monitoring qorytyndysy boiynsha QR BǴM Bilim jáne ǵylym salasynda sapany qamtamasyz etý komiteti 196 kolledjden 500 mamandyq pen 738 biliktilik boiynsha litsenziiaǵa qosymshalaryn qaitaryp aldy, dep habarlaidy "Ult aqparat" atalǵan vedomstvonyń baspasóz qyzmetine silteme jasap.
Kolledjder belgili bir mamandyqtar boiynsha stýdentterdi oqytqanymen, beiini men bilim berý qyzmetine qoiylatyn biliktilik talaptaryna sáikes bolmai shyqty. Osyǵan bailanysty BǴM tarapynan litsenziialardy qaitarý jumystary júrgizildi.
Bilim berý baǵdarlamalarynyń sapasy, pedagogikalyq jáne oqytýshylar quramynyń jetkiliksizdigi, oqý úrdisin júzege asyrý úshin qajet materialdyq-tehnikalyq bazanyń jáne oqý-zerthanalyq jabdyqtardyń bolmaýy syndy buzýshylyqtar da oryn alǵan.
Bul kolledjderdiń stýdentteri basqa oqý oryndaryna aýystyrylyp, oqytýshylar jumysqa ornalastyryldy.
«Biz osy baǵyttaǵy jumysty joǵary oqý oryndarynda da, kolledjderde de júrgizip jatyrmyz. Memleket basshysy bilim berý sapasyn arttyrý boiynsha tapsyrma bergen bolatyn. Shyn máninde, elimizde sapaly bilim beretin kolledjder kóp, biraq bári birdei emes. Osy oraida júieli jumys júrgizilip jatyr, degenmen qatań sharalar da qabyldanady. Eger meditsinalyq kolledj qarjygerlerdi, býhgalterler men programisterdi, al agrotehnikalyq kolledj – mektepke deiingi uiymdardyń tárbieshilerin, qurylys kolledji – dene shynyqtyrý muǵalimderin jáne t.b. baǵyttar boiynsha mamandardy daiarlasa, sapaly bilim berý týraly qalai aitýǵa bolady? Tipti bul oqý oryndarynyń qajet bazasy, tiisti kadrlary men oqý úrdisine qajet jabdyqtary da joq bolǵanyn aita ketken jón», – dedi QR BǴM Bilim jáne ǵylym salasynda sapany qamtamasyz etý komitetiniń tóraiymy Gúlzat Kóbenova.
