Abai kúnin merekeleý aiasynda Beijińniń ortalyq «Chaoian» saiabaǵyndaǵy «Tszintai» murajaiynda Abai oqýlary ótkizildi, dep habarlaidy QazAqparat.
Is-shara áigili qytai músinshisi Iýan Sikýn jasaǵan, 2014 jyldyń naýryz aiynda Beijiń ortalyǵyndaǵy «Chaoian» saiabaǵynda ornatylǵan Abai eskertkishine gúl qoiý rásiminen bastaldy.
Abai oqýlaryn QHR Syrtqy ister ministrliginiń, Mádeniet jáne týrizm ministrliginiń, Qytai Halyq shet eldermen dostyq qoǵamynyń, ShYU Hatshylyǵynyń, Qytaidaǵy TMD elderi diplomatiialyq ókildikteriniń basshylary, Qazaqstan jáne Qytai stýdentteri tyńdady.
QR-nyń QHR-daǵy elshisi Ǵabit Qoishybaev óz sózinde Abaidyń shyǵarmashylyǵy, onyń qazaq filosofiiasy men ádebietiniń qalyptasýyndaǵy róli týraly qysqasha aityp berdi.
«Osydan jeti jyl buryn Beijińniń qaq ortasynda uly aqyn Abaiǵa eskertkish ornatylǵan edi. Bul aitýly oqiǵa eki jaqty mádeni-gýmanitarlyq yntymaqtastyqta mańyzdy iz qaldyryp, Qytai jurtshylyǵyn qazaq ádebietiniń klassikasymen tanystyrýǵa jasalǵan taǵy bir qadam boldy», - dedi ol.
Diplomat Abaidy qytai tiline alǵashqy bolyp daryndy aýdarmashy Ha Hýanchjan aýdarǵanyn eske saldy. Abai shyǵarmalaryn qytai tiline aýdarýǵa ataqty jazýshy jáne ádebiettanýshy Akbar Májit úlken úles qosty. Óz kezeginde qytailyq músinshi Iýan Sikýn sońǵy jyldary Beijińdegi Abai eskertkishindegi Abai oqýlary jaqsy dástúrge ainalǵanyn atap ótti.
«Jyl saiyn munda Abaidyń klassikalyq óleńderin oqý úshin Qazaqstan men Qytaidan jastar jinalady», - dedi ol.
«Qytai jazýshylary» baspa toby Bas basqarmasynyń basshysy Akbar Májit buryn Abai qazaq dalasynyń uly bolǵanyn, onyń shyǵarmalaryn álemniń 47 tiline aýdarǵannan keiin Abai álemge tanymal bolǵanyn atap ótti. Sondai-aq, Akbar Májit Qytaida Abaidyń eńbekteri men qara sózderi 1950 jyldardan bastap qytai tiline aýdarylyp kele jatqanyn tilge tiek etti.
Qazaq tilin úirenip júrgen qytailyq bilim alýshylar men Qytaidyń joǵary oqý oryndarynda oqyp jatqan qazaqstandyq jastar Abai shyǵarmalarynan úzindiler kórsetip, qazaqstandyq diplomattardyń balalary qazaqtyń tanymal mýzykalyq kompozitsiialaryn oryndady.
