Short-trekten Qazaqstan komandasynyń kóshbacshysy, álem kýbogi kezeńderiniń jeńimpazy ári júldegeri Abzal Ájiǵaliev pen konkimen júgirýden tórt qurlyq chempiony Ekaterina Aidova 2022 jylǵy Beijiń Olimpiadasynda Qazaqstan olimpiadalyq quramasynyń týyn ustaýshylar bolyp bekitildi. Bul týraly búgin Ulttyq Olimpiadalyq komitette habarlady.
Ekaterina Aidova eń alǵash ret 2010 jylǵy Vankýver Olimpiadasynda qatysty, keiin Sochi-2014 jáne Phenchhan-2018 oiyndarynda el namysyn qorǵady. 30 jastaǵy Aidova úshin Beijiń oiyndary óz mansabyndaǵy tórtinshi Olimpiada bolmaq. Tájiribeli sportshy konkimen júgirýden álem kýbogi kezeńiniń, 2017 jylǵy Ýniversiada oiyndarynyń júldegeri, 2021 jylǵy tórt qurlyq chempionatynyń jeńimpazy.
«Qysqy Olimpiada oiyndarynyń ashylý saltanatynda elimizdiń bairaǵyn kóterip shyǵatyn alǵashqy qazaqstandyq sportshy qyz ekenimdi maqtan tutamyn. Kóptegen atletter úshin bul alǵashqy Olimpiada, al keibireýleri tórtjyldyq dodasyna birneshe ret qatysqan. Alaida, Olimpiadaǵa qansha ret qatyssań da, ondaǵy sezim ózgermeidi. Eliń úshin maqtanasyń jáne úlken jaýapkershilik baryn túsinesiń. Beijińde el úmitin aqtaý úshin bar kúshimizdi salamyz», - dedi Ekaterina Aidova.
Abzal Ájiǵalievtiń enshisinde short-trekten álem kýbogi kezeńderiniń barlyq júldesi bar, 2017 jylǵy Ýniversiada, 2011 jylǵy Aziia oiyndarynyń medali de qorjynnan tabylady. Abzal 2014 jáne 2018 jyldardaǵy Olimpiadaǵa qatysyp, Phenchhanda Qazaqstannyń týyn kóterip shyqqan bolatyn. Ol mundai qurmetke ekinshi ret ie bolyp otyr.
«Olimpiada oiyndarynda Qazaqstannyń týyn alyp shyǵý - men úshin abyroi. Elińniń bairaǵyn ashylý saltanatynda kóterip shyqqandaǵy sezim ómir boiy umytylmaidy. Bizge senim artqan barsha jankúierge alǵysymyz sheksiz. Barlyq olimpiadashylar atynan bul básekeni asyǵa kútkenimizdi aitqym keledi. Sportshylarǵa daiyndalý úshin bar jaǵdai jasaldy. Elde de, shetelde de daiyndaldyq. Endi olimpiada aidynynda el namysyn abyroimen qorǵaý úshin barymyzdy salamyz», - dedi Abzal Ájiǵaliev.
Qysqy Olimpiada oiyndarynyń ashylý saltanaty 4 aqpan kúni Beijińdegi ulttyq stadionda ótedi.
