Beijińde ótip jatqan Olimpiada oiyndarynda Abaidyń «Aittym sálem, Qalamqas» áni shyrqaldy, dep habarlaidy "Ult aqparat" QazAqparat agenttigine silteme jasap.
Naqtyraq aitsaq, latviialyq mánerlep syrǵanaýshy Denis Vasilev qysqa baǵdarlamada qazaqtyń uly aqyny Abaidyń «Aittym sálem, Qalamqas» ánine óner kórsetti.
Vasilev qysqa baǵdarlama saiysynda 85,30 upai enshilep, 16-orynǵa jaiǵasty. Endi ol 10 aqpanda erkin baǵdarlamada synǵa túsedi.
Denis osydan 4 jyl buryn, iaǵni 2018 jyly birinshi ret Phenchhan Olimpiadasyna qatysqan edi. Onda ol jarysty 19-orynmen aiaqtaǵan. Beijiń - onyń ekinshi olimpiadasy.
Sondai-aq, sportshy qańtardyń aiaǵynda ótken Eýropa chempionatynda qola medal jeńip alǵan. Bul - onyń karerasyndaǵy eń joǵary jetistigi jáne latviialyq mánerlep syrǵanaý tarihyndaǵy eń úzdik nátije.
Ázirge onyń ne úshin Abaidyń «Aittym sálem, Qalamqas» ánin tańdaǵany belgisiz.
