Beijińdegi qysqy Olimpiada oiyndarynda shańǵydan erler arasyndaǵy sprintten irikteý jarystary aiaqtaldy, dep habarlaidy QazAqparat.
Atalǵan synda el namysyn erlerden Evgenii Velichko men Vitalii Pýhkalo qorǵaǵan bolatyn. Ókinishke qarai ekeýi de shirek finalǵa shyǵatyn úzdik 30 shańǵyshynyń qataryna ilige alǵan joq.
Atap aitsaq, jarys qorytyndysy boiynsha Velichko 62-orynǵa, al Pýhkalo 66-orynǵa jaiǵasty. Osylaisha qazaqstandyq sportshylar sprintte irikteýden óte almady.
Jarystyń erejesine sáikes, shirek finalǵa joldama alý úshin sportshylar alǵashqy 30 shańǵyshynyń qataryna enýi kerek.
Esterińizge salaiyq, osyǵan deiin áielder arasynda ótken sprintten irikteý saiysynda arýlarymyz úzdik 30 sportshynyń qataryna qosyla almady.
Aita keteiik, Beijiń qalasyndaǵy 2022 jylǵy qysqy Olimpiadada sporttyń jeti túrinen 109 medal jiyntyǵy sarapqa salynady. Aq Olimpiadada elimizdiń atynan 34 sportshy 85 joldama boiynsha el namysyn qorǵap jatyr.
