Búgin Beijińdegi XXIV qysqy Olimpiadada shańǵymen jarysý jáne biatlonnan synǵa túsetin atletter Chjantsziakoý klasterinde jattyǵýǵa kiristi, dep habarlaidy QazAqparat.
QR Ulttyq olimpiada komiteti málim etkendei, sportshylar sońǵy jattyǵý jiyndaryn shetelderde ótkizdi, sondyqtan Qytaiǵa deiingi sapar barysynda barlyq qaýipsizdik sharalaryn saqtaly.
Biatlonshylar Beijińge Ystanbuldan keldi.
Sondai-aq, osy reispen Beijińge shańǵyshylar daushyp keldi. Olar da taýly aimaq Chjantsziakoýda synǵa túsedi.
Esterińizge sala keteiik, XXIV qysqy Olimpiada oiyndaryna Qazaqstan quramasynan barlyǵy 34 sportshy qatysady, olar 87 joldama jeńip aldy.
Búginde olar olimpiada qalashyǵyna ornalasty. Qazaqstandyqtar shańǵy jarysy, fristail akrobatika jáne mogýl, konkimen júgirý, short-trek, biatlon, taý shańǵysy, tuǵyrdan sekirý, shańǵy qossaiysy siiaqty 8 sport túrinen synǵa túsedi.
Oiyndardy «Qazaqstan», «Qazsport», «Habar» jáne «El arna» telearnalarynan tikelei efirden kórýge bolady.
Tórtjyldyq dodanyń ashylý saltanaty Nur-Sultan ýaqytymen 4 aqpan kúni, saǵat 17:55-te bastalady.
Olimpiadanyń saltanatty ashylý rásiminde elimizdiń bairaǵyn biyl alǵash ret bir emes, eki sportshy alyp shyǵady.
Onyń biri - short-trekten Qazaqstan quramasynyń kóshbasshysy Abzal Ájiǵaliev bolsa, ekinshisi - konkishi Ekaterina Aidova.
Eki sportshymyz da - quramadaǵy tájiribeli, júldege talasýǵa múmkindigi joǵary sportshylar.
