Beijiń olimpiadasynda fristail-akrobatikadan Qazaqstan ulttyq qurama komandasynyń aǵa jattyqtyrýshysy Jibek Arapbaeva otandyq sportshylardyń óneri men nátijesine qatysty túsinik berdi, dep habarlaidy QazAqparat.
«Aldymen aitarym, fristail-akrobatika sporty bir orynda turǵan joq. Jyl sanap jetile túsip jatyr. Buryn qyzdar úshin sekirý kórsetkishi basqasha bolsa, qazir qyzdar uldarmen birdei deńgeide myqtylyǵyn dáleldeý kerek. Iaǵni buryn ekeýlik deńgeide sekirse, endi úsheýlik sekirý qajet. Beijiń olimpiadasyna sońǵy 2 jyl tynymsyz daiyndaldyq. Fristail-akrobatikadan ótken jyly bolǵan álem kýbogynda bizdiń sportshylar óte jaqsy nátije kórsetti», - dedi J. Arapbaeva Beijińnen tikelei efirde ótken baspasóz máslihatynda.
«Negizi biz fristail-akrobatikadan finalǵa shyǵýdy maqsat tutyp kelgenbiz. Óz basym qyzdardy maqtan tutamyn, kórsetkishterine rizamyn. Bizdiń sportshy qyzdar batyl, erjúrek», - deidi ol.
Sondai-aq, brifingte Beijiń olimpiadasynda fristail-akrobatikadan finalǵa shyqqan jerlesimiz Aqmarjan Qalmurzaeva jarystan keiingi áserimen bólisti.
«Jarys kezinde qobaljý boldy. Sebebi halyqaralyq olimpiadanyń finalyna birinshi ret shyǵýym. Qobaljýdan keiin de saiys qiynǵa soqty dep oilaimyn. Birneshe qatelik jiberdim. Degenmen joldan taiyp ketpei sońyna deiin bardym. Shańǵym ketip qalǵanda joldan shyǵa salsam bolar edi, biraq men óner kórsetýdi jalǵastyra berdim. Qulamaýǵa tyrystym, iaǵni qolymnan kelgenniń bárin istedim. Tóreshilerdiń óz sheshimi bar, 11 orynǵa laiyq boldym», - deidi sportshy.
