Búgin Beijińde qysqy Olimpiada oiyndarynyń alǵashqy básekeleri bastalyp ketti, dep habarlaidy QazAqparat.
Búgin kerlingten dabl-mikst boiynsha toptyq kezdesýler ótip jatyr.
Birinshi jarys kúninde Ulybritaniia men Shvetsiia, Avstraliia men AQSh, Norvegiia men Chehiia, Qytai men Shveitsariia arasynda matchtar ótýde.
Kerlingten dabl-mikst boiynsha on qurama komanda júldege talasady. Birinshi ainalymnan soń tórt úzdik komanda jartylai finalǵa joldama alady.
Final jáne qola medal úshin kezdesý 8 aqpanǵa josparlanǵan.
Erteń, iaǵni 3 aqpan kúni qazaqstandyq Fristailshylar alǵashqy irikteý jarystaryn bastaidy.
Fristail-mogýldan Beijiń Olimpiadasynda Qazaqstan atynan alty sportshy synǵa túsedi.
Qazaqstan komandasynyń enshisinde alty joldama bar. Qysqy oiyndarda tórt áiel jáne eki er adam baq synaidy. Atap aitar bolsaq, Iýliia Galysheva, Aiaýlym Ámirenova, Olesia Graýr, Anastasiia Gorodko, Dmitrii Reiherd jáne Pavel Kolmakovqa jankúier bolamyz.
Atalǵan sport túrinde 13 júlde jiyntyǵy sarapqa salynady.
Fristailshylar dodasy 3-19 aqpan aralyǵyna josparlanǵan.
